Danişîna doza rojnameger Kîbriye Evren ku bi îdiayên ‘Endama rêxistinê ye’ û ‘Propagandaya rêxistinê kiriye’ tê darizandin, dê sibe li 5’emîn Dadgeha Cezayên Giran a Amedê bê dîtin
Rojnamevan Kîbriye Evren di 9’ê cotmeha sala 2018’an de li Amedê hatibû binçavkirin û bi îdiayên ‘Endama rêxistinê ye’ û ‘Propagandaya rêxistinê kiriye’ hate girtin. Sibê dê 8’emîn danişîna doza rojnameger Evren li 5’emîn Dadgeha Cezayên Giran a Amedê pêk bê. Dozger di danişîna 6’emîn de mutaala xwendibû.
Dozger di mutaalayê de bi îdiayên ‘Endama rêxistinê ye’ û ‘Propagandaya rêxistinê kiriye’, dixwest ku rojnameger Evren heta 20 salan bê cezakirin. Li dijî mutaalayê jî rojnameger Evren di 18’ê tîrmehê de parastin kiribû û diyar kir ku her qadekê jin lê, qada rojnamegeriyê ye û bi salan e der barê jinan de nûçeyan çê dikin. Evren destnîşan kir ku ji ber xebatên rojnamgeriyê hatiye girtin.
Dihat payîn ku dadgeh di danişîna 24’ê îlonê de biryarê bide. Lê ji ber ku dozgerê komarê yê Mêrsîn û Rihayê têkildarî lêpirsînên salên 2012 û 2013’an de bersiv nedabûn, danişîn hatibû taloqkirin. AMED
