2’yemîn danişîna Doza Kobanê ku hevserokên HDP’ê yên berê Fîgen Yuksekdag û Selahattîn Demîrtaş jî di nav de 28 kes girtî bi giştî 108 kes têne darizandin, li kampusa Girtigeha Sîncanê ku 22’emîn Dadgeha Cezayên Giran a Enqereyê bi rêve dibe, dest pê kir.
Beriya ku danişîna dozê dest pê bike, li hundir û derveyî Kampusa Girtîgeha Sîncanê polîsan tedbîrên pir zêde girtin. Beriya danişîn dest pê bike, parêzer, parlamenter û kesen dozê bişopîne, bi hinceta li salonê lêgerîna bombeyê heye demek dirêj li pêş kampusê hatin rawestandin. Piştî lêgerînê yek bi yek hildan hundir. Li salonê zêdebûna polîsan bal kişand. Ji bo malbat û şopdarên dozê salonek cuda hat amadekirin.
Rojnamegeran negirtin salonê
Polîsan rojnamegerên ku xwestin dozê bişopînin û derbasî salonê bibin, bi hinceta karta wan a turkuazê tune, hilnedan hundir. Dîsa destûr nedan ku telefon û kompîtûrê jî têxin hundirê salonê.
Hevberdevkê HDK’ê Sedat Şenoglu, Hevserokê ESP’ê Şahîn Tumuklu û wekilên HDP’ê tev li danişîna dozê bûn. Dîsa nûnerên Delegasyona Tirkiyeyê yên Yekitiya Ewropayê jî doz şopandin.
Kesên ku girtî têne darizandin bi rêya SEGBîS’ê tev li danişînê bûn. Tê payîn ku di nava rojê de siyasetmedar Sebahat Tuncel, Fîgen Yuksekdag û Selahattîn Demîrtaş mafê axaftinê bigirin. Di danişînê de 200 parêzer dozê dişopînin. ENQERE
