Navenda Ragihandin û Çapemeniyê ya HPG’ê li ser kuştina Midûrê Asayîşa Deriyê Gumrukê yê Serzêrê Xazî Salih Elîxan daxuyaniyeke nivîskî parve kir.
Daxuyaniya HPG’ê ya li ser mijarê wiha ye: “Midûrê Asayîşa Deriyê Gumrukê yê Serzêrê yê başûrê Kurdistanê Xazî Salih Elîxan li gundê Gelite yê nehiya Kanîmasî ya Duhokê di 8’ê cotmehê de di encama êrîşekê de jiyana xwe ji dest da. Di daxuyaniya Midûriyeta Asayîşa Giştî ya Herêma Başûrê Kurdistanê de û di nûçeyên hin saziyên medyayê de tevgera me hate sûcdarkirin û ji vê êrîşa tarî berpirsyar hate nîşandan. Lê belê tu eleqeya hêzên me bi vê êrîşê re nîne. Lewma daxuyanî û nûçeyên hatine dayîn nerast in, dûrî rastiyê ne.” BEHDÎNAN
