Dayîka Ahmet Topkayayo ke vera tecrîdê Îmrali de Zîndanê Tîpa Dyî yê Amedî de kewto rojeyê mergî Fatma Topkayaye dîyar kerde ke heta kamî wext do mergî bivirazîyî û va: “Şêrêne biewnêne zîndanan, heme şitilê ma bîyî çengêk. Nika ke merg nêvirazîyayî qanûnan pê bîyarên.”
15 hepsîyê sîyasî ke 4 zîndananê cîya-cîyayan de 30ê Nîsane de seba wedarnayîşê tecrîdê serê Rayberê PKKyî Abdullah Ocalanî û reaksîyon nîşandayîşê bêvengîya rayapêroyî çalakîya xo ya grevê vêşanîye açarnayî rojeyê mergî. Hepsî Ahmet Topkayayî 1ê Adare ra nata Zîndanê Tîpa Dyî yê Amedî kewto grevê vêşanîye û nika zî tewrê 15 hepsîyanê 4 zîndananê cîya-cîyayan kewt rojeyê mergî. Topkaya serra 1992î de qezaya Hênê ya Amedî de ameyo dinya. 18 serrî yê xo de mektebê lîse terikna û seba xebat û piştîdayîşê keyeyê xo şî Antalya. Topkayayî ewja de tewrê HPGyî beno. Topkaya Hezîrana 2016î de çolterê qezaya Lîcê de operasyonêko leşkerî de birîndar yeno tepiştene û 22 serrî cezaya zîndanî ci rê yeno birnayene. Topkayayî roja ke ameyo tepiştene ra nata Zîndanê Tîpa Dyî yê Amedî de tewqîfkerde yo.
Dayîk Fatma Topkayaye derheqê rewşa lajê xo de qisey kerde: “Ez bi serran paweyê xebera lajê xo menda. Ez 2016î ra nata lajê xo zîndan de vînena. Lajê mi 1ê Adare de dest bi grevê vêşanîye kerd. Ez heme pêvînayîşan ra diman bi moral zîndan ra vejîyena. La nika hîssin şona zîndan. Ma moral danî yewbînan. Lajê mi embazanê xo reyde qerardar o û moralê înan gird o.”
Wa dewlete gamêk bierza
Dayîk Topkayaye qiseykerdişê xo de bale ante rojeyê mergî ser û wina dewam kerde: “Ez hurmet nîşanê îradeya lajê xo dana. Wa êdî dayîk nêbermî. Êdî bes o. Wa dewlete gamêk bierza. Wa zîndanan ra cenaze nêvejîyî. Pêroyê înan domanê ma yî.”
Şêrêne biewnêne zîndanan, heme şitilê ma bîyî çengêk
Topkayaye tewr peynî daye zanayene ke hepsî bêvengîya rayapêroyî vera dest bi rojeyê mergî kerdî û wina qedênaye: “Ganî şar werizo payan ser û sere wedarno. Qey kesêk nêwirzeno payan ser û sere nêwedarneno? No bi no bêvengî nêresenî ti cayêk. Êdî çîyêko ke ma vajî nêmendo. Dayîk raştê hêrişan yenî. Dayîk çi kerdî? Eke şar pêro-pîya nêwerizo payan ser, ma do netîce nêgirî. Ma veng danê Wezîrîya Edaletî ke qanûnan bi caabîyaro. Ez şew û roje bermena. Werdo ke ez wena mi dejneno. Verê ke merg nêvirazîyayî, ganî dewlete gamêk bierza. Ciwanê ma nêmendî. Heta kamî wext do wina bibo. Şêrêne biewnêne zîndanan, heme şitilê ma bîyî çengêk. Nika ke merg nêvirazîyayî qanûnan pê bîyarên.” AMED
