Gerîlayê HPGyî Mahmût Alinbayî 23ê hezîrane de netîceyê pêrodayîşêkî de Dêrsim de şehîd bi û 25ê Hezîrane de zî qezaya Pîranî ya Amedî de cenazeya ci ameye definkerdene. Mezelê Alinbayî 98 rojan mîyan de 6 reyî raştê hêrişan ame. Keyeyê Alinbayî vera texrîbkerdişê mezelan de ajansê Mezopotamya rê qisey kerd û reaksîyon nîşan da
Dayîka Alinbayî Salîha Alinbaye va ‘gelo şima merg ra nêtersenî’ û wina dewam kerde: “Fek mezelê lajê mi ra verabidê. Eke wina dewam bikero, ez do mezelê lajê xo ser o nobete tepişa. Tayê kesan dîyar kerd ke roja ke mezelî ameyî texrîbkerdene, nizdîyê goristanî de wesayîtê zirxinî ameyî dîyayene. Mezelî 24 saetî bi kamerayanê mobeseyan yenî taqîbkerdene.”
Dayîke dewamê qiseykerdişê xo de wina va: “Wexto ke reya sifteyîne hêriş bi, ez nêşîya. Labelê dima ra 4 reyê bînî zî hêrişî bîyî. O wext ez şîya. Înan mi ra va ‘to çira mezelî ser o Şehîd Pîro nuşto?’. Dima ra înan reaksîyon nîşan da û mi ra va ‘ma mezel ra meyît vejenî, ti ameya hesabê kerrayêk persena’. Raştîya xo de no vatiş îtîraf o. Ez do muracatê zaf cayan bikera. Ez nêtersena, eke îcab bikero ez do mezelê lajê xo ser o bi şewe û roje nobete bitepişa.”
Ê Muslumanîye zî nêzanî
Dayîke Alinbaye dîyar kerde ke lajê aye netîceyê hêrişê sîleho kîmyewî de şehîd bîyo û wina va: “Nika zî mezel de rehetî nêdanî. Ê xo ra vanî Musluman. Labelê eke ê Musluman bibîyêne, bi sîlehanê kîmyewîyan hêriş nêkerdêne. Reyna 4 rojî meyîtê ci erd de nêverdayêne. Ê Muslumanîye zî nêzanî, wa bêrî ma ra bimusî. Fek lajê mi ra veradê. Na senî rik a?” AMED
