Merdimanê Serdem Agirî (Osman Abdî) yo ke hêrişanê kîmyewîyan ê dewleta tirke yê vera Zap, Avaşîn û Metîna şehîd bi, bêvengîya vera şixulnayîşê çekanê kîmyewîyan şermezar kerde û veng da ke wa dezgehê eleqedarî şirê Herêmanê Pawitişî yê Medya de cigêrayîş bikerê.
Dewleta tirke ya îşxalkere hêrişanê ke 14ê nîsana 2022yî de vera Zap, Metîna û Avaşînî dayê destpêkerdene de çekanê kîmyewîyan şixulnena. HPGyî vat hêrişanê ke 6 aşmî xo dima verdayî heta inkey tewr tay 2 hezar 476 rey çekê kîmyewîyî û qedexeyî ameyî şixulnayene. Têna aşmanê tebaxe, êlule û teşrîna verêne de 17 gerîlayî pê çekanê kîmyewîyan şehîd bîyî. Înan ra yew zî Serdem Agirî yo.
Dayîka şehîd Serdem Agirîyî Hamdîye Ehmeda ke ANFyî rê qisey kerd PDK rexne kerd û vat: “Heme şarê kurdî wayûbira yo. Ganî PDK kiştê şarê xo de bo. Semedê ronayîşê Kurdîstanê azadî ganî ma bibê yew. PDK ganî kiştê gerîlayan ca bîgêro. Eke ê kiştê şarê kurdî û gerîlayan de nîyê qey xo rê vanê ‘ma kurd ê.’ Eke ê kurd bîyênî û menfeatê Kurdîstan û kurdan bipawitêne, paştî dayênê gerîlayan. Çîyo ke PDK keno xîyanet o. Eke ê xayîn nêbîyêne inkey pîya bi dewleta tirke tênêgêrayêne.”
Dayîke Hamdîye Ehmed bêvengîya mîyannetweyî zî şermezar kerd û vat ke ganî şarî pêsîrê dewleta tirke veramedê.
Babîyê şehîd Serdem Agirîyî Mihemed Abdî zî bale ante serê şixulnayîşê çekanê kîmyewîyan ser û vat: “Dewleta tirke seba ke nêeşkena têkoşînê gerîlayan bişikino çekanê kîmyewîyan şixulnena. No zî îspatê binkewtişê ci yo. PDKyo ke dewleta tirke rê rayîr virazeno ke rehet şiro Herêmanê Pawitişî yê Medya dest na maskeyanê gazî yê gerîlayan ser. Seba ke maskeyî çînêbî gerîlayî şehîd bîyî. Eke dişmen nêbîyêne çîyo winayên nêkerdene. Ganî şarê dinya bieşnawê ke vera gerîlayan çekê kîmyewîyî yenê şixulnayene û verê nê bîgêrê.” QAMIŞLO
