Dayîka Zulkuf Gezeno ke seba şermizarkerdişê tecrîdê serê Rayberê PKKyî Abdullah Ocalanî 17ê adare de Zîndanê Amedî de çalakîya fedaî pê ardbî û cuya xo peynî kerdbî, Havva Gezene şîye mezelê lajê xo ser û va: “Waştişê embaza Leyla û embazanê to ame ca. Ez ameya ke mizgînî bida to.”
Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvene ke seba wedarnayîşê tecrîdê serê Rayberê PKKyî Abdullah Ocalanî 8ê Teşrîna Peyêne ya 2018î de Zîndanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kerde. Çalakîya Guvene 16ê Kanûne de vilayê zîndananê Tirkîye bî û 1ê Adare de zî pêroyê zindanan de grevê vêşanîye dîyayî destpêkerdene. Çalakîya Guvene 200 rojan dewam kerde û tewr peynî 30 hepsîyê PKK û PAJKî çalakîya grevê vêşanîye açarnayî rojeyê mergî û rojeyê mergî 27 rojan dewam kerd. Badê vengdayîşê Rayberê PKKyî Abdullah Ocalanî ke 26ê aşme de hetê avûkatanê ci ra ame dayene, hepsîyan grevê vêşanîye û rojeyê mergî qedîna û sewqê nêweşxaneyan ameyî kerdene, kontrolê weşîya hepsîyan hema zî dewam keno.
Prosesê çalakîyan de bi hezan hepsî kewtî grevê vêşanîye, 30 hepsî kewtî rojeyê mergî û 1ê ci teberê welatî de 8 hepsîyî zî çalakîya fedaî pê ardî. Sewbîna teberê welatî bajarê Krefeldî yê Almanya de 20ê Sibate Ûgûr Şakarî hemverê tecrîdî de adir verda bedenê xo û 22ê Adare de cuya xo kerde vînî. Zulkuf Gezenî (33) 17ê Adare de hemverê tecrîdî de Zîndanê Tîpa F-2 yê Tekîrdagî de, Ayten Beçete (24) 23ê Adare de Zîndanê Gebze de, Zehra Saglame (23) 24ê Adare de Zîndanê Tîpa Tyî yê Otlû de, Medya Çinare (24) 25ê Adare de Zîndanê Tîpa Eyî yê Mêrdînî de peynî ro cuya xo arde. Yonca Akici 29ê Adare de Zîndanê Şakranî yê Cinîyan de çalakî viraşte û 1ê Nîsane de cuya xo vindî kerde. Siraç Yuksekî zî 2ê Nîsane de Zîndanê Tîpa T-2yî yê Osmanîye de û Mahsûm Pamayî zî 5ê Nîsane de Zîndanê Xarpêtî yê bi Asayîşê Berzî de bi heman amacî çalakî viraşte û cuya xo kerde vînî.
Dayîka çalakgero fedaî Zulkuf Gezenî Havva Gezen û pîyê ci Şehmuz Gezenî badê ke çalakîyê grevê vêşanîye û rojeyê mergî peynî bîyî, şîyî mezelê lajê xo ser.
Dayîk Havva Gezene wextêko derg mezelê lajê xo Gezenî ser de vindete. Dayîk Gezene mezelê Gezenî ser de gamê hîssin cuyaye û lajê xo rê va: “Waştişê embaza Leyla û embazanê to ame ca. Ez ameya ke mizgînî bida to.” AMED 
