Li Amed, Edene û Mêrsînê dayik û malbatên girtiyan ji bo ku balê bikişînin ser çalakiyên greva birçîbûnê çalakî li dar xistin. Tevî astengkirinên polîsan jî dayikan li ber xwe dan û çalakiyên xwe pêk anîn. Dayikan xwest ku tecrîd bi dawî bibe
Bi hezaran girtiyên li girtîgehên bakurê Kurdistanê û Tirkiyeyê ji bo rakirina tecrîda li ser Rêberê Gelê Kurd Abdullah Ocalan, di greva birçîbûnê de ne. Li hêla din jî 30 girtiyên ji doza PKK û PAJK’ê di çalakiya rojiya mirinê de ne. Ji bo piştgiriya bi daxwazên zarokên xwe û balkişandina ser rewşa wan, dayik û malbatên girtiyan jî li qadan li ber xwe didin.
Di vê çarçoveyê de dayik û malbatên girtiyan jî ji 1’ê gulanê ve her roj dimeşin Parka Koşuyolu ya Amedê û ji wir jî dimeşin TUAY-DER’ê. Tevî hemû astengiyan jî dayik ev 15 rojin parkê kom dibin û çalakiyê pêk tînin. Dayikên girtiyan îro jî li pêşiya Aşê Gurbuz ê li kêleka parkê kom bûn û xwestin bimeşin parkê. Di çalakiyê de parlamenterên HDP’ê Saliha Aydenîz, Remziye Tosun, Mûsa Farisogullari û Semra Guzel jî amade bûn. Li ser astengkirina polîsan jî dayikan çalakiya rûniştinê pêk anî.
Dayikan 5 saetan li ber xwe da
Dayikan di çalakiyê de dirûşmên ‘bijî berxwedana zindanan’, ‘Em ê bi berxwedanê bi ser bikevin’, ‘Leyla Guven rûmeta me ye’, ‘Ji hevrêyên li zindanan li ber xwe didin re hezar slav’ û ‘Heq û hiqûq dê ji zindanan bên’ berz kirin. Dayikan di çalakiyê de strana ‘Zindana Diyarbekir em ê bişikînin’ gotin. Polîsan bi zorê rojnameger ji qadê dûrxistin. Dema ku rojnamegeran xwest dorpêça polîsan bikişinin, polîsan rojnameger asteng kirin. Li ser vê yekê parlamenter Aydenîz kamerayên rojnamegeran jê girt û dîmen kişandin. Dayikan bi nîşaneyên serkeftinê bertek nîşanî polîsan dan. Dayik li dijî hewldana polîsan ku dixwestin wan li wesayîtan siwar bikin li ber xwe dan û destûr nedan. Piştî berxwedana 5 saetan, dayikan dorpêç şikand û bi dirûşm û tililiyan derbasî TUAY-DER’ê bûn.
Çalakiya li Edeneyê
Bi heman boneyê, dayik û xizmên girtiyan li ber Girtîgeha Tîpa M ya Ceyhanê çalakî pêk anî. Di çalakiyê de parlamentera HDP’ê Tulay Hatîmogullari, endam û rêveberên HDP, DBP, HDK û TUAYDER a Çukurovayê jî amade bûn. Polîsan nehiştin ku malbat li ber avahiya girtîgehê daxuyaniyê bidin û gef xwarin. Dayikan bertek nîşanî polîsan dan û dirûşma ‘bijî berxwedana zindanan’ berz kirin. Di çalakiyê de polîsan li nasnameya malbatan nêrî.
Li Mêrsînê jî dayik li qadan bûn
Li Mêrsînê jî bi heman armancê dayik û malbat li Parka Bariş a Akdenîz a Mêrsîne kom bûn û çalakî li dar xist. Di çalakiyê de endam û rêveberên HDP û DBP’ê jî amade bûn. Malbatan di çalakiyê de dirûşma ‘bijî berxwedana zindanan’berz kirin. Piştî çalakiya rûniştinê polîsan nasnameyên dayik û malbatan di GBT’ê re derbas kirin. Malbatan piştî demekê dawî li çalakiyê anîn. AMED
