Dayikên girtiyan ên ku di dema çalakiya li Parka Koşuyolu ya Amedê de ji hêla polîsan ve hatin derb û îşkencekirin, der barê polîsên îşkencekar de serlêdana sûc kirin
Malbat û dayikên girtiyên ku ji bo rakirina tecrîda girankirî ya li ser Rêberê Gelê Kurd Abdullah Ocalan di greva birçîbûnê û di çalakiya rojiya mirinê de, ji bo piştgiriya bi çalakiyên zarokên xwe re û bal kişandina ser rewşa wan, ev demeke li Amedê çalakiyan li dar dixin. Dayik û malbatên girtiyan di her carê de rastî êrîşa tund a polîsan tên û destûr nayê dayîn ku çalakiya xwe li dar bixin.
Di vê çarçoveyê de dayikên girtiyan dema ku li Parka Koşuyolu ya Rezan a Amedê xwestin çalakiyê pêk bînin, rastî êrîşa polîsan hatin û hatibûn derb û îşkencekirin. Dayikan der barê polîsên îşkencekar de serlêdana sûc kirin. Dayik Hayriye Demîr, Yaşar Akboga û Rabîa Ataş ku hatibûn îşkence û derbkirin, ji bo serlêdana sûc tevî parêzerên xwe çûn Edliyeya Amedê.
Dayikan der barê polîsan de bi hinceta ‘Birîndarkirina bi zanebûn, îşkence û muameleya xerab, bikaranîna zorê, bi cih neanîna fermana amiran û astengkirina raman û îfadeyê’ serlêdana sûc kirin. Dayikan piştî ku li Nexweşxaneya Lêkolîn û Perwerdehiyê ya Dicleyê rapora tenduristiyê wergirt, li Dozgeriya Komarê serlêdana sûc kir. AMED
