Çalakîya grevê vêşanîye ke 27ê Teşrîna peyêne vera tecrîdê serê Rayberê PKKyî Abdullah Ocalan û binpaykerdişê heqan amebi destpêkerdene, dewam kena. 8ê teşrîna peyêne 2018 de zî bi rayberîya hemsereka Kongeraya Komela Demokratîke (KCD) Leyla Guven grevê vêşanîye yê bêdem û bêagêrayîş amebi destpêkerdene û heme zîndanan de vila bibi. Nê prosesî de dayîkan zî bi çalakîyê paştdayîşê ke kerdî, rolêk girîng girewtibî serê milê xo. Dayîkan nê prosesî de bêmabên bi laçigê sipî çalakîyê xo dewam kerdibî. Dayîkê Aşitî ke reya ewilî grevê vêşanî de xoverdayîş danê destpêkerdene, dîyar kerdî ke eke hewce bikero ê do zî bikewê grev.
‘Aşitîyêk mende lazimîyê pêro kesan o’
Dayîka Aşitîye Hîdayete Ay dîyar kerd ke ê do reyna paştdayîş bidê grevê vêşanîye û va: “Ma şer û pêrodayîş nêwazenê û m apêro tepişteyan rê azadî wazenê. Wa gonî bêra vindetene û aştîyêk mende awan bo. Reyna di serrî verê domanê ma kewtibî grevê vêşanîye û ma seba înan çalakî kerdib. O wext polîsan xeylêk rey hêrişê ma kerd. Mi warway merkezê HDPyî ra girewtî û kerdî wesayît. Ê va û varanî de, nêverdayî ke solanê xo bikerî linganê xo. Ma dayîk bî û ma muameleyêk xirab dir rî bi rî mendî. Labelê ma reyna zî domananê xo destek kenê. Heta ke aştîyêk mende nêro, do xoverdayîşê ma dewam bikero. Ma çend destek bidê tepişteyan, do hende xoverdayîş pîl bibo. Ma domananê xo yê tepişteyan tena nêverdenê. Eke hewce bikero ma do zî bikewê grev.”
‘Ma nêwazenê zîndanan ra cenaze bivejîyî’
Dayîka Aşitîye ra Raîfe Ozbeye zî qiseykerdişê xo de wina va: “Tepişteyê ke dest bi grevê vêşanîye kerdî, heqê xo yê meşru xebetnenê. Wa sebir û onurê ma reyde nêro karkerdene. Xora domanê ma tepişteyê û destê îna de yê. Heqê înan yê telefon û pêvînayîşî binpay kenê. Şertê zîndananê baş nîyê. Êdî wa zilm biqedîyo. Senî ke ma verê cû domananê xo tena vera nêdayî, ma nika zî dest bi çalakîyan kenê. Ma nêwazenê zîndanan ra cenaze bêrî vetene. Ganî talebê tepişteyan bêrî qebulkerdene û tecrîd wedarîyo. Wa seba pêro şaran aşitî pê bêro.
‘Wa çareserî bêro vînayene’
Tewr peynî Dayîka Aşitîyê Hanîfe Akpolate qisey kerde û aye zî va: “Serra verên ma çalakîyanê grevê vêşanîye de semedê domananê xo tax, kuçe û raşteyan de çalakîyan pê ard. Senî ke aye wext domananê xo tena vera nêdayî, ma nika zî înan tena vera nêdanî. Tecrîd tena Îmrali û zîndanan de çin o. Tecrîd ma pêronan ser de esto. Nêweşî rewşa tepişteyan kena tehluke. Eşkerayo ke proses zehmet vîyareno. Ma nêwazenê domanê ma bimirê. Wa çareserî bêro vînayene.” AMED
