Dayîke Emîne Şenyaşara ke 7 rojî yo verê edlîyeyê Riha de pê waştişê edaletî çalakîya roniştişî kerdêne hetê polîsanê tirkan ra ameye destbendkerdene. Dîya zanayene ke Dayîke Emîne pê îdîaya ke ‘vera wezîfedarê umûmîye heqaretî’ ameye destbendkerdene û ameye berdene bi Mudirîya Asayîşî ya Riha.
Serekê Baroyê Riha Abdullah Oncelî vera rewşe nêrazîbîyayîşê xo mojna û vat: ”Ez do mesele teqîb bikera.”
Ferît Şenyaşar verê edlîyeyî de çalakîya xo rê dewam keno.
Qezaya Pirsûsî ya Riha de wextê weçînayîşanê 2018î de 24ê hezîrane de pawitoxanê Wekîlê AKPyî Îbrahîm Halîl Yildizî û merdimanê ci hêrişê keyeyê Şenyaşarî kerd.Emîne Şenyaşara ke 2 lajê ci û mêrdeyê ci hetê pawitox û merdimanê Wekîlê AKPyî Halîl Îbrahîm Yildizî ra kişîyayî, lajê xo Ferît Şenyaşar reyde 7 rojî yo verê edlîyeyê Riha de pê waştişê edaletî çalakîya roniştişî kena. RIHA
