Dayîkê Şemeyî no hewte seba Kadîr Keremoglu yo ke 14ê Nîsane 1995 de ameyo vîndîkerdene ameyî têhet
Dayîkê Şemeyî seba ke aqûbetê vînîbîyayeyanê xo pers bikerî, reya 735. Meydanê Galatasayî de waşt ke bêrê têhet, la polîsan reya bîne destûr nêda înan. Astengbîyayîşê polîsan ser o Dayîkê Şeme kuçeyê Şûbeyê Stenbolî yê Komeleya Heqê Merdiman (ÎHD) de ameyî têhet û çalakîya xo viraşte. Derûdorê kuçeyî hetê polîsan ra ame girewtene. Destê dayîkan de fotografê vînîbîyayeyan û çalakwanan zî tîşortê ke ser o fotografê vînîbîyayeyan estê xo ra dayî.
Parlamentera HDPyî ya Stenbolî Zuleyha Gulum, Hemverxatoxa Kongreya Şaran ya Demokratîk (HDK) û parlamentera HDPyî ya Mûşî Gulîstan Kiliç Koçyîgîte, parlamenterê CHPyî yê Stenbolî Sezgîn Tanrikulu, avûkatê Sekreterê Pêroyî yê Cepheyê Xelasî yê Şarî yê Filîstînî Ahmed Saadetî Mahmûd Hasan zî paştdayîş da çalakîye. No hewtê aqûbetê Kadîr Keremoglu yo ke 14ê Nîsane 1995 de ameyo vîndîkerdene ame persayene.
Eşkerayîya nê hewteyî waya Hayretîn Erenî yo ke derbeya 12 Êlule 1980 ameyo vîndîkerdene wende û va: “Seba ke dewleta Tirkî dewletêka huqûqî nîya, kesê dewletê îdarê kenê xo serê huqûqî de vînenê, heqa ma yê têhetameyîş û protestokerdişî 36 hewteyo bi hawayêkê keyfî yenê astengkerdene. No astengkerdiş, senî ke heqanê ma binpay keno, eynî wext de goreyê qanûnê bingeyênî zî meşrû nêyo.”
Erenî ard ziwan ke keyeyê Keremogluyî yo ke Gever ra yo Wan de ciwîyêne û va: “Seba ke rewşa keyeyî baş bîye mensûbanê JÎTEMî ci ra xerac waştêne û tehdît kerdêne vatêne ‘lîsteya merdişî de nameyê şima esto.’ Keyeyî ke xeracdayîş qebûl nêkerd, JÎTEMî rê bi hedef. Keremogluyî yo ke 75 serrî yo 14ê Nîsane 1995 de hetê mensûbanê JÎTEMyî ra ame remnayene.”
Lajê Keremogluyî Bahattîn Keremogluyî zî va: “Waştişê ma yê edaletî esto. Ez vengdayîş bi dewlete kena, nê îşkencayan ca verdê. Ma wazenê ke teyna estikan bidê ma. Wa gorêkê pîyê mi bibo. Wa gorêk bibo ma hewteyêk, serêk rey bo zî do ci rê Fatîha biwanê. Ma gêrayîşê edaletî ra fek ranêverdanê. Ma do tim nê wareyan de bibê.” STENBOL
