Li Stenbolê starta pîrozbahiya Newrozê bi şîara ‘Em bi Agirê Newrozê li ber xwe bidin û azad bibin’ dest pê kir. Dayikên Aştiyê agirê Newrozê geş kirin û tariya şeva Stenbolê ronî kirin. Li Stenbolê dê di 20’ê Adarê de li Qada Yenikapi Newrozê bê pîrozkirin. Starta pîrozbahiya mezin şevê din bi geşkirina agir dest pê kir. Dayikên Aştiyê li Guvercîntepe ya Navçeya Başakşehîrê agirê Newrozê geş kirin û Newroz pîroz kirin. Endam û rêveberên HDP’ê jî di nav de bi sedan kes tev li pîrozbahiyê bûn. Girsê li dora agir govend gerandin û dirûşmeyên ‘Bijî Newroz’, ‘Bijî Serok Apo’ û ‘Bijî berxwedana Kobanê’ berz kirin û çalakiya girtiyan a 107 roj in li dijî tecrîdê di greva birçîbûnê de ne silav kirin.
Girsê piştî agir geş kirin govend gerandin û xwe di ser agir re hilkirin. Ciwanan bang li hemû gelê Stenbolê kirin ku di 20’ê Adarê de li qada Yenikapiyê bi coşek mezin Newrozê pîroz bikin. STENBOL
