Dayikên girtiyên ku ji bo rakirina tecrîda li ser Ocalan di greva birçîbûnê û rojiya mirinê de, ji bo ku balê bikişînin ser rewşa zarokên xwe li Qada Mahabad a Amedê laçikên xwe yên spî bi daran ve girê dan. Dayikan xwest ku tecrîd bi dawî bibe
Grevên birçîbûnê yên bêdem û bêdorveger ên ji bo rakirina tecrîda girankirî ya li ser Rêberê Gelê Kurd Abdullah Ocalan li girtîgehan, li welat û derveyî welat bi tevlêbûna bi hezaran kesan hatine destpêkirin, berdewam in. Her wiha çalakiya rojiya mirinê ku bi tevlêbûna 15 girtiyan di 30’ê nîsanê de dest pê kir jî kete roja 9’an.
Ji bo piştgiriya bi çalakiyên greva birçîbûnê re û bal kişandina ser rewşa wan, malbat û dayikên girtiyan li gelek bajaran çalakiyên cur bi cur li dar dixin. Di çalakiyan de dayik bi laçikên xwe yên spî ku sembola aştiyê ne, dadikevin qadan.
Ji bo balkişandina ser rewşa zarokên xwe û piştgiriya bi çalakiya wan re, dayikên girtiyan li Qada Mahabad a Amedê laçikên spî bi daran ve girêdan. Malbatan bi darên seranserî rê ve laçikên spî girêdan û xwestin tecrîd bi dawî bibe û ji bo aştî û demokrasiyê gavên çareseriyê bên avêtin. AMED
