Navenda Nûçeyan |
Dayikên Şemiyê ji bo dîtin xizmên xwe yên di bin çavan de hatine windakirin û darizandina kujerên wan, lêgerîna xwe ya edaletê didomînin. Dayiken Şemiyê di hefteya 790’an de dîsa ji ber şewba vîrûsa koronayê (Covîd-19) çalakiya xwe li ser medyaya civakî berdewam kir. Vê hefteyê ji bo Hasan Ocak ê di 21’ê adara 1995’an de hatiye windakirin û cenazeyê wî di nava goristana bêkesan de hatibû dîtin edalet xwestin.
Dayika Hasan Ocak, Emîne Ocak diyar kir ku 25 salin ji bo kurê xwe li edaletê digere û wiha got: “Em ji bo her kesî edaletê dixwazin. Em dixwazin gorên her kesî bên dîtin.” Birayê Ocak, Huseyin Ocak jî bang li rayedarên dewletê kir û xwest ku kujeran neparêzin û wiha domand: “Rastiya xwe qebûl bikin. Hesap ji paşeroja xwe bipirsin û hesap bidin. Civakên ku hesap ji kiryarên xwe dipirsin û hesap didin azad û di nava aştiyê de dijîn.”
‘Hewl didin Hasan Ocak weke sûcdar nîşan bidin’
Der barê mijarê de xwişka Ocak, Masîde Ocak jî ev tişt anî ziman: “Waliyê Stenbolê Hayrî Kozakçioglu, belgeyên di destê xwe de nîşan dan û got; ‘Kurê we ji bo dewletê kesê lêgerîna wî heye.’ Ev agahî piştre bi midûrê polîsan ê Stenbolê û wezîrê karên hundir Nahît Menteşe re hate parvekirin. 25 sal in kujerê ku Hasan binçav kirin û kuştin tên parastin. Dixwazin Hasan wekî sûcdar nîşan bidin.”
Serpêhatiya Ocak
Vê hefteyê xwarziya Hasan Ocak, Dîlcan Acer daxuyanî xwend û serpêhatiya xalê xwe vegot. Acar wiha got: “Di 21’ê adara sala 1995’an de li navçeya Avcilar a Stenbolê li dayika xwe geriya û gotibû; ‘Ez ê ji bo şîva êvarî masiyan bînim.’ Lê ne wê şevê û ne jî careke din êdî nehat. Şahidan diyar kirin ku Hasan Ocak birine Şaxa TEM’ê ya Midûriyeta Polîsan a Stenbolê. Malbata Ocak serî li gelek cihî dan. Lê encam negirtin. Neaşê Hasan Ocak piştî 58 rojan li Goristana Bêkasan a Altinşehîrê hate dîtin. Bi îşkenceyê hatibû kuştin. DMME’yê Tirkiye sûcdar kir. Lê dozger hêj tenê bi nivîsan lêpirsînê berdewam dikin. Em Edaletê dixwazin.”
