Di ser koçkirina siyasetmedarê kurd û aktîvîstê aştiyê Orhan Dogan ê li meclîsê got “Dostên Hêja! ji ber ku min qada aştî lê serdest e ava nekir lêborînê dixwazin” û piştre bi kaşkirinê hat binçavkirin re 12 sal derbas bû. Dogan wê sibê li Cizîrê bê bibîr anîn
Siyasetmedarê kurd û aktîvîstê Aştiyê Orhan Dogan di Mihrîcana Tûrzma Çand û Hunerê ya Ahmedê Xanî ya Bazîdê de di 27’ê Hezîrana 2007’an de dema li ser dikê axaftin dikir kriza dil derbas kir û jiyana xwe ji dest dabû. Parlamenterê berê yê Partiya Demokrasiyê (DEP) Orhan Dogan 12 sal berê koç kir û wê sibê li ser gora xwe ya li Cizîrê bê bibîr anîn. Dogan ku hemû temenê xwe di oxira aştiyê de derbas kir, dê sibê li Goristana Asrî ya Cizîrê saet di 17.30’an de bê bibîr anin. Di bîranîna Dogan de wê xizmên wî, hezkiriyên wî, endam, rêveber û parlamenterên HDP’ê, şaredarê Bajarê Mezin ê Mêrdînê Ahmet Turk û gelek kesên din wê amade bibin.
Orhan Dogan kî ye?
Orhan Dogan di 25’ê tîrmehê 1955 li gundê Xelîla ya Kerboran a Mêrdîn ji dayik bû. Di malbateke karmend de bû. Ji ber karê bavê xwe jiyan û xwandina xwe li gelek cihan bidawî kiriye. Piştî bidawîkirina dibistana amadeyî sala 1974’î de dest bi Fakûlteya Dadnasiyê ya Enqereyê kir. Piştî xwendinê bû parêzer û di rewşên dijwar de parêzvaniya çalakgerên kurd kir. Bi damezrandina partiya legal a kurdan HEP’ê ve dest bi karê polîtikayê dike. Wekî parlamenterê kurd tê hilbijartin û dikeve Meclisa Komara Tirkiyê. Di sala 1994’an de bi darê zorê Dogan û parlamentêrên kurd ên DEP’ê, bi dijûn û geflêkirinan ji aliyê polîsên dewletê ve ji meclisê tên derxistin û zîndanîkirin.
Dogan li gel Leyla Zana, Selîm Sadak, Hatîp Dîcle nêzîkî 11 salî di girtîgehê de mabû. Piştî serbestberdanê dîsa dest bi xebatên xwe yên polîtîk kir. Tenduristiya Orhan Dogan di axavtineke xwe ya li Bazîdê de xira bû û ew bi mirina masûlkeyên dil (qeyrana dil, krîza dil) li nexweşxaneya Zanîngeha Wanê jiyana xwe jidestdide. Dogan zewicî û xwedî 5 zarokan bû. ŞIRNEX
