Festîvala Kultur û Xoza ya Munzurî ya 21. emser mabênê 2-6ê tebaxe de do bêra kerdene. Federasyonê Komeleyan ê Dêrsimî (DEDEF) bi eşkerayîyêka çapemenîye bernameyê Festîvala Kultur û Xoza ya Munzurî ya 21. eşkera kerd.
Endamê Heyetê Rayberdişî yê DEDEFî Ulaş Yegînî eşkerayîye wende. Yegînî pare kerd ke 2yê tebaxe de bi aktîvîteya kultur û bawerî yê Duzgun Babayî startê festîvale do bêro dayene. Yegînî vist vîrî ke Festîvala Munzurî 23 serrî verî vera talanê xoza, polîtîkaya bêmerdimverdayîşî û sermaye dîyabî destpêkerdene. Yegînî ard ziwan ke 23 serrî yo ê vera HES, ocaxanê madenan, awbendan û hêrişanê sermaye û dewlete xo ver danê.
Yegînî da zanayene ke bernameyê festîvale de muzîk, panelê serê ekolojî, tîyatro, sînema û kargehê domanan est ê. Yegînî vat: ”Festîvala Munzurî xîretê wayîrvejîyayîşê ziwan, tarîx, kultur û bawerîya ma yo. Ma venga pêro dêrsimijan û dostanê înan danê ke tewrê na festîvale bibê.”
Hetê bînî ra eşkerayîye de vera talanê daristananê Akbelenî yê Mugla nêrazîbîyayîş ame mojnayene û dîya zanayene ke DEDEF hetê xoverdayîşê şarê Akbelenî de yo. DÊRSIM
