Serêşîya Kongreya Komelê Demokratîkî (KCD), Têgêrayîşê Cinîyan Azadan (TJA), Partîya Demokratîke ya Şaran (HDP) û Partîya Herêman ê Demokratîkan (DBP) de startê Newroza 2023î ame dayene. Deklarasyonê Newroze Merkezê Kultur û Hunerî yê Dicle Firatî yê Sûrê Amedî de ame eşkerakerdene.
Pîya bi KCD, TJA, DBP û HDPyî Platformê Cinîyan ê Yewîbîyayeyan, Partîya Azadîye û Merdimî (PÎA), Partîya Demokratîkî ya Kurdistanî ya Tirkîya (KDP-T), Partîya Azadî û Partîya Komînîste ya Kurdistanî (KKP) deklerasyon îmza kerd. Emser do Newroze bi şîarê ”Her der Newroze, her dem azadî” bêro pîrozkerdene. Deklarasyon de Newroza emserî dîyarîya kesanê ke erdlerzê Mereşî de dinyaya xo bedilnaye, bîye.
Hemsereka Pêroyî ya DBPyî Salîha Aydenîze vat ê startê Newroze danê û vat: ”Hezar serrî yo Newroze sey roja ganîbîyayîş, serhildan û azadîye yena pîrozkerdene. La emser seba ke ma dejê erdlerzî ancenê ma Newroze dîyarîya kesanê ke erdlerzî de dinyaya xo bedilnaye, kenê. Adirê Newroze do hêver Şemzînanê Colemêrgî de bêro tafînayene û Newroze 43 bajaran de bêro pîrozkerdene. Ma do bi girkerdişê adirê Newroze îqtîdarî ra hesab bipersê. 17 û 18 adare de do yadkerdişî bêrê kerdene.”
Deklarasyonê Newroze yo kurdkî hetê Hemserekê Pêroyî yê KCDyî Berdan Ozturkî ra ame wendene. Deklerasyon bi sernameyê ”Bi adirê Newroze ver bi azadîye” ame hazirkerdene de ca dîya nînan: ”Rixmo ke erdlerzî aşmêke xo dima verdaye, hema zî tesîrê giranî yê rijnayîşî dewam kenê. Nê qewimîyayîşanê peyênan reyna mojna ma ke rolê herêmî senî muhîm o. Seba ke îqtîdarê AKP-MHPyî destna îdareyanê herêmî ser netîce wina giran bi. Modelê komara demokratîke tek çare yo. Ma do emser bi hêrsê xo sey serewedaritişê Kawayî yê vera Dehakî roja Newroze sey roja îqtîdarî ra hesabpersayîşî verwazî bikerê. Ma do Newroze de reyna waştişê azadîya Birêz Ocalanî û heme tepişteyanê sîyasîyan bîyarê ziwan û na roje sey mijdanê binkewtişê îqtîdarî vînenî. Ma do bi ruhê yewîya neteweyî û paştîdayîşî yo ke erdlerz de vejîya werte, vejîyê waranê Newroze û dormeyê adirî de semedê edalet û haştîye bigîrê. Wa Biciwîyo Newroze.”
Hemsereka Pêroyî ya HDPyî Pervîn Buldane zî vat Newroza emserî do biba destpêkerdişê bedilnayîşê girdî û îqtîdarî ra vajo ”wextê to bîyo de.” AMED
