DEM Partî weçînayîşanê 31ê adare de 7 qezayanê Riha de ser kewt. AKPyo ke rixmê heme xîleyanê xo nêeşka nê qezayan de ser bikewo bi metodanê bînan keno ke dest nê şaredarîyan serano. Qezayanê Curnê Reş û Xelfetî de yê Riha de badê îtîrazê AKPyî do newera weçînayîş bêro kerdene.
Hetkarê Hemserekanê DEM Partî Ruştu Tiryakî yê ke vizêr derheqê babete merkezê partîye de eşkerayîye daye. Tiryakîyî vat: ”Belgeyê heme bêhuqûqîyanê ke hetê AKPyî ra ameyî kerdene est ê. Eşkera ma ser kewtî. Rixmo ke bêhuqûqîye hetê AKPyî ra ameya kerdene îtîrazê ci zî yenê qebulkerdene. Curnê Reşî de sindoq, pusula, tewreyê rayan û heme malzemeyê weçînayîşî vêşnayî ke weçînayîşî betal bikerê. Merdimanê namzedê AKPyî nê kerdî. No çîyo mîyan zî nîyo şima eşkene medyaya sanale ra biewnî nê dîmenan ra. Xelfetî de zî rayê hazir ê morkerdeyî şuxulnayî. Ma muracatê Heyetê Weçînayîşî yê Bajarî kerd la muracatê ma ame redkerdene. Naye ser o ma muracatê YSKyî kerd. Ma sey DEM Partî na neheqîye qebul nêkenê. Ma do xover bidê. Ma do kuçeyan de nêrazîbîyayîşê xo yê demokratîkî ramojnê û bi rayîrê huqûqî têkoşînê xo bidomnê.”
