Vervatoxa Partîya Têdûştîye û Demokrasîyî (DEM Partî) Ayşegul Dogane bînaya partî ya merkezî de derheqê biranê kombîyayîşê Heyetê Rayberdişî yê Merkezîyî (MYK) de eşkerayîye daye çapemenîye.
Ayşegul Dohane hêverî qurbanê Qirkerdişê Zîndanan ê 19ê Kanûne, qurbanê Qirkerdişê Mereşî û Taybet Înane yad kerdî.
Dogane qala weçînayîşanê herêmîyan ê 31ê adara 2024î kerde û vat: ”Ma şaredarîyê ke bi zorî ma ra ameybî girewtene apey bigêrê. Îradeyê şarê ma do qeyûman bişawo.”
Vervatoxa DEM Partî Ayşegul Dogan da zanayene ke qezayê 10 şaristanan de ê do namzetanê xo bimojnê û nameyê nê qezayan eşkera kerdî. Goreyê ney nê qezayî wina yê: ”Qezayê Ceyhan, Seyhan û Yuregîrî yê Adana; qezaya Kepezî ya Antalya; qezayê Akdenî, Toroslar û Tarsusî yê Mersînî, qezayê Esenyurt, Sancaktepe, Adalar û Sultanbeylî yê Stenbolî, qezayê Dîdîm, Efeler, Germencîk û Soke yê Aydinî, qezayê Cîhanbeylî û Kuluyî yê Konya; qezaya Dilovasiyî ya Kocaelî; qezayê Torbali, Bayrakli û Menemenî yê Îzmîrî; qezayê Golmarmara, Turgutlu û Yunusemreyî yê Manîsa; qezaya Gokçeada ya Çanakkale û qezayê Çorlu û Çerkezkoyuyî yê Tekîrdagî.”
Hetê bînî ra Dogane pê hesna ke seba namzetîya namzedanê hemşaredarîye û meclîsanê şaredarîyan wextê muracatî heta 25ê kanûne ameyî dergkerdene. ANQARA
