Hevserokê HDP’ê yê berê Selahattîn Demîrtaş ku ji dozeke Şirnexê dihat darizandin xwest derkeve pêşberî dadger û qebûl nekir ku bi SEGBÎS’ê tev li danişînê bibe
Danişîna doza hevserokê Partiya Demokratîk a Gelan (HDP) ê berê Selahattîn Demîrtaş li 44’emîn Dadgeha Cezayên Asliye ya Enqereyê hate dîtin. Demîrtaş dema ku hevserokê Partiya Aştî û Demokrasiyê (BDP), di 27’ê kanûna sala 2013’an de li Şirnexê tev li şahiyekê bûbû. Ji ber axaftina di vê şahiyê de jî der barê Demîrtaş de doz hatibû vekirin.
Dozgerê Komarê yê Şirnexê bi îdiaya ‘Demîrtaş li dijî xala 2911’an derketiye’ doz vekiribû. Demîrtaş ku xwestibû derkeve pêşberî dadger lê daxwaza wî nehatibû qebûlkirin. Şandeyê xwest ku Demîrtaş bi SEGBÎS’ê tev li danişînê bibe. Demîrtaş tevlêbûna bi SEGBÎS’ê red kir û tev li danişînê nebû.
Parêzerên Demîrtaş jî xwestin şandeya dadgehê bê guhertin û reda dadger xwest. Lê şandeya dadgehê danişîna dozê taloqî 7’ê cotmehê kir. ENQERE
