Navenda Nûçeyan |
Dihat payîn ku îro 5 rojnameger û aktivîstên Behdînanê ku ji aliyê PDK’ê ve hatine girtin, werin dadgehkirin. Lê carek din dadgehkirina wan ji bo 21’ê cotmehê hat taloqkirin.
Piştî biryarê carek din malbatên girtiyan nerazîbûna xwe anîn ziman.
Amed Silêman Kemal kurê yek ji girtiyên Behdînanê ye, bi daxuyaniyek çapemeniyê nerazîbûnek tund nîşan da.
Amed Silêman diyar kir ku PDK dixwaze ev xelk bê hêvî be lê dê her tim werin ber derê dadgehê û li kolanan bin û wiha got: “Ger di seytereyan de jî rê li wan were girtin, dê hertim bên û nerazîbûna xwe bînin ziman, em tenê daxwaza mafê xizmên xwe dikin.”
Her wiha Amed wiha bang li xelkê başûrê Kurdistanê kir: “Ez bang li hemû xelkê Kurdistanê dikim, ger hûn bixwazin helwestek nîşan bidin, ji hilbijartinan re tenê çend roj man, bi tu awayî dengê xwe nedin PDK’ê.”
