Nameyê hepsîyê doza PKK û PAJKî ser Denîz Kaya eşkerarîyêke da û da zanayene ke grûba diyîn ke 15 kesan ra pê yena do semedê şikitişê tecrîdê serê Rayberê PKKyî Abdullah Ocalanî 10ê Gulane de dest bi rojeyê mergî bikera
Semedê şikitişê tecrîdê serê Rayberê PKKyî Abdullah Ocalanî 15 hepsîyê xoverdayoxê grevê vêşanîye 30ê Nîsane de çalakîya xo açarnabi rojeyê mergî. Nameyê hepsîyê doza PKK û PAJKî ser Denîz Kaya eşkerarîyêke da û da zanayene ke grûba diyîn ke 15 kesan ra pê yena do semedê şikitişê tecrîdê serê Rayberê PKKyî Abdullah Ocalanî 10ê Gulane de dest bi rojeyê mergî bikera.
Eşkerayîya Denîz Kayayî wina ya:
“Pêvînayîşê ke 12ê Çele û 2ê Gulane de ameyî viraştene eşkera ramojnenê ke hesabê leymin yê dewlete yê. Ne yew mutabakaat ne zî yew prosesê muzakare û dîyalogî esto. Ma sey hepsîyê PKK û PAJKî 7 madeyan ra waştişê xo çapemenîye rê deklere kerdîbî. Wa no zaf hol bêro zanayene ke heta nê waştişê ma merê caardene, tecrîd temamî nêro wedartene çalakîyê ma bi qeradarîya girde do dewam bikerê. Na hamleya ke bi şîarê ‘Ma tecrîdî biqedînê, faşîzmî birijnê û Kurdistanî azad bikerê’ rayberîya Leyla Guvene de ameya destpêkerdene, hemleya xoverdayîşî ya û do ser bikewo. Ma vînenê ke berpirsîyarê dewlete semedê tecrîdî biisrar ê. Bedelê ci çi beno wa bibo, ma do bi israr xoverdayîşê xo xurt bikerî. Na babete de wa şikê tu kesêk çin bo. Vera naye ma zî bi grûba diyêne ya rojeyê mergî xoverdayîşê xurt kenê. Çalakîya grevê vêşanîye ya bêdem û anêgêrayîşî ke bi serkêşîya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî 182. roja ya de grevê vêşanîye ya bêdem û anêgêrayîşî de ya, teber û zîndanan de dewam kena. Ma sey hepsîyê doza PKK û PAJKî danî zanayene ke hemverê israrê bêvengîya selahîyetdaranê dewleta tirkî yê tecrîdê serê Rayberê PKKyî Abdullah Ocalanî de do bi grûba diyîn çalakîya rojeyê mergî biresnî xoverdayîşêko berz. 30ê Nîsane de bi tewrbîyayîşê 15 embazê maçalakîya rojeyê mergî dîya dest pêkerdene. 15 hepsîyê bînî zî 10ê Gulane de dest bi rojeyê mergî bikerî.”
Nameyê kesekê do 10ê Gulane de bikewê rojeyê mergî wina yê:
“Zîndanê Kandira ra Yaşar Cînbaş, Muhammed Înal, Diyadîn Akdemîr û Engîn Kahraman,
Zîndanê Tîpa Fyî yê Boluye ra Îbrahîm Dogan , Ahmet Emîn Eren û Mustafa Taştan
Zîndanê Patnosî ra Sena Efe, Burhan Şik, Faysal Atak û Şefîk Kayhan
Zîndanê Hûmara 1. ya Tekîrdagî ra Reşat Ozdîl
Zîndanê Hûmara 2. ya Tekîrdagî ra Zekî Bayhan, Yilmaz Yildiz
Zîndanê Asayîşo Berz yê Wanî ra zî Saît Ozturkî do 10ê Gulane de dest bi çalakîya rojeyê mergî bikerî.
Na çarçewe de çalakîya ma ke bi 15 kesan ameye destpêkerdene do 10ê Gulane ra tepîya bi 30 kesan heta bicaardişê waştişanê ma bêro domnayene. Ma xoverdayîşê merdimê tepişteyan silam kenê û veng danê şarê xo ke wa pêro pîya xoverdayîş gird bikerê. Xoverdayîş serkewtiş o û ma do miheqeq ser bikewê…”
