Serdozgeriya Komarê ya Stenbolê der barê 27 girtiyên ji bo rakirina tecrîda li ser Ocalan ketine greva birçîbûnê, doz vekir. Di îdianameyê de girtî bi îdiaya ‘alîkariya rêxistinê kirine’ tên tewanbarkirin
Li Girtîgeha Jimar 2 ya Maltepeyê der barê 27 girtiyên ku ji bo rakirina tecrîda girankirî ya li ser Rêberê Gelê Kurd Abdullah Ocalan ketine greva birçîbûnê ya bêdem û bêdorveger, doz hate vekirin. Di îdianameya ku ji aliyê Serdozgeriya Komarê ya Stenbolê ve hatiye amadekirin de girtî bi îdiaya ‘alîkariya rêxistinê kirine’ tên tewanbarkirin.
Dozger di îdianameyê de parast ku girtiyên li dijî tecrîda Îmraliyê ketine greva birçîbûnê ‘bi disîplîna rêxistinê bi awayekî yekgirtî çalakî pêk anîne û bi vî awayî bi zanebûnî alîkariya rêxistinê kirine.’ Îdianame ji aliyê 26’emîn Dadgeha Cezayên Giran a Stenbolê ve hate qebûlkirin.
Navên girtiyên ku der barê wan de doz hatiye vekirin wiha ne: “Azad Kurkçu, Çetîn Gumuş, Eyyup Sever, Feyyaz Karaç, Gokmen Subaşi, Hasan Yildirim, Hebun Kurt, Kenan Çeçen, Kenan Sagun, Kerîm Kiliç, Mahşuk Karlidag, Malîk Onurcan, Muhammed Yildiz, Onur Kasak, Ozgur Sonmez, Serhat Goregen, Ugur Onur, Velat Kazançci, Servet Aygun, Nuh Yildirim, Mazlum Guvercîn, Omer Bozdag, Omer Ulus, Uzeyîr Şevluk, Şaban Yilmaz, Kerîm Kiliç û Suleyman Çikmaz.” STENBOL
