Yewîya Hêzê Şorişgerî yê Dêrsimî derheqê weçînayîş û asayîşê sindoqan de hadreyîya xo temam kerd û vengê wayîrvejîyayîşê rayan kerd
Weçînayîşê herêmî rê tena 3 rojî mend. Namzedê Yewîya Hêzê Şorişgerî yê Dêrsimî xebatanê xo dewam kenî û heme hadreyîya xo yê seba asayîşê weçînayîşî temam kerdî. Merkezê Dêrsimî de pêropîya 27 hezar û 17 weçînitoxî estî û do merkez de 97 sindoqî bêrî ronayene. Yewîya Hêzê Şorişgerî yê Dêrsimî ke bin banê HDPyî de şono weçînayîş seba sindoqan wezîfedar û muşadîtan dîyar kerd û seba 17 mekteban ke do rayî tede bêrî eştene de zî berpirsîyaran tayîn kerd.
Baroya Dêrsimî do weçînayîşê herêmî nizdî ra taqîp bikera û Merkezê Taqîpkerdişî û Asayîşê Weçînayîşî awan kerde.
Dêrsim hadre yo
Berpirsîyarê Karê Malumatê Merkezî yê Yewîya Hêzê Şorişgerî yê Dêrsimî Îbrahîm Kasunî derheqê asayîşê weçînayîşî û tedbîrê ke do weçînayîş de bigîrî de malumatan da. Kasunî qiseykerdişê xo de dîyar kerd ke ê seba weçînayîşî xebatanê esasî rayîr benî, heme hadreyîya înan temam o û pawenê ke şar wayîrê rayanê xo bivejîyo. Kasuni da zanayene ke seba şaredarîyêka ya şar, ganî her kes şêro sindoqan ser û rayan xo bido namzedê Yewîya Hêzê Şorişgerî yê Dêrsimî. DÊRSIM
