Vakurê Kurdistanî de cinîyî seba 25ê Teşrîna Peyêne Roja Têkoşînê Vera Şîdetê Serê Cinîyan meydanan de bîyî.Cinî û camêrdan ê ke vejîyayî meydanan vat ke vera şîdetî komelêkê azad awan bikê
Cinîyî çarçewa 25ê Teşrîna Peyêne Roja Têkoşînê Vera Şîdetê Serê Cinîyan de vera şîdetê dewlete û camêrdan vejîyayî meydanan. Cinîyî ne meydanan ne zî kuçeyan ca nêverda.
Amed: Rayberîya Komeleya Cinîyan a Rosa Torra de Têkoşînê Vera Şîdetî û Platformê Cinîyan ê Dîcle-Amedî ”rayraşîyayîşê şewe” serûber kerde. Cinîyî bi kincanê xo yê herêmîyan tewrê rayraşîyayîşî bîyî. Wekîla Partîya Demokratîke ya Şaran (HDP) ya Colemêrgî û Hemsereka Kongreya Komela Demokratîke (KCD) Leyla Guven, Wekîla HDPyî ya Amedî Salîha Aydenîz, aktîvîste Ayşe Gokhan, Ayla Akat, hemserekê HDPyî yê qezayan, îdarekarî û zaf kesî tewrê rayrabîyayîşî bîyî. Cinîyan cigêrayîşê polîsan ra dima dest pê rayraşîyayîşî kerd. Cinîyan sloganê ”Cinîye do qisey bika, kiştoxî do hesab bidê”, ”Biciwîyo Xoverdayîşê Rojawanî”, ”Kiştişê Cinîyan Polîtîk o”, ”Hemserekîye xeta ma ya mor a” vatî.Cinîyan derheqê 25ê teşrîna peyêne de beyanatêk da. Endama Komeleya Cinîyan a Rosa Bedrîye Aydin qisey kerd û vat: ”Serranê qijan de zewijîyayîş, şîdetê vera domanan û cinîyan senî medya de ca gêno ganî a nê pêro muneqeşa bikê.” Aydine ra dima Leyla Guvene zî qisey kerd û vat: “Ma cuya ke pê qirkerdişan vîyarena qebul nêkenê. Şerî de cinîyî mirenê. wayanê mîrabelan ra heta Sara, Sêvê, Avesta her roje pêro cinîyî vera rejîmê zorbazî xo ver danê. Cinîyî vera faşîzmî xo ver danê.” Rayraşîyayîşî bi govendanê cinîyan qedîya.
Dêrsim: Dêrsimî de zî rayberîya Platformê Cinîyan ê Dêrsimî de Meydanê Seyîd Rizayî de çalakîyêk ameye kerdene. Çalakî de pankartê bi nuşteyê ”Ma seba cuya têdûşte û azade wayîrê heqanê xo bivejîyê” ame berzkerdene. Bi nameyê Platformê Cinîyan ê Dêrsimî Şukrane Yilmaz qisey kerd û îfade kerd ke hêrişê vera cinîyan, keda cinîyan û nasnameyê cinîyan her ke şono beno zêdêr. Yilmaze ard ziwan ke cinîyî hetê kesanê tewr nêzdîyê ci ra yenê kiştene. Yiilmaze vat ke 17 serran de 15 hezarî ra zêdêr cinîyî ameyî kiştene. Yilmaze vat: “Ganî cayanê xebate de seba mobîng, şîdetî xebatê qanûnî bêrê kerdene, cinîyî bi vayêkê kêmî nêrê xebitnayene, vayo têdûşt bêro vilakerdene. Polîtîkayê şerî yê vera cinîyan ê ke yenê manaya feqîrîye, koçkerdişî, şîdet hînî ganî biqedê. Beyanatî ra dima cinîyan govend kerd. Meclîsê Cinîyan ê Şaredarîya Dêrsimî û Komîsyona Têdûştîya Komelkî zî bire girewte ke seba xebatkaran qase rojêke destûrê reglî bidê. Bire hetê meclîsê şaredarîye ra ameye qebulkerdene. Çime/ANF
