Bi wesîleya serrgêra Komployê Mîyanneteweyî yê 9ê Teşrîna Verêne yê vêra Rayberê Şarê Kurdî Abdullah Ocalanî Dêrsim, Çewlîg û Xarpêt de eşkerayîyê çapemenî ameyî kerdene. Çewlîg de derheqê babete de panelêk zî ame kerdene.
Dêrsim
Dêrsim de hetê rêxisitna Partîya Demokratîke ya Şaran (HDP) ra Kuçeyê Sanatî de eşkerayîye ameye dayene. Hemserekê HDPyî yê Dêrsimî Îbrahîm Kasimî ke tîya qisey kerd bale ante tecrîdê Îmraliyî ser û vat: ”Tecrîd şexsê Ocalanî de ewro pêro walatî ra vila beno. Bi nê tecîrî de yeno waştene ke şarî bênefes bimanî. No vera hêvîya çareserî yê şarî hêrişêk o. wazenê ke komelî bikerê bêpawitiş û şaran biverdê yewbînan. Ma do semedê cuya hembere têkoşînî rê dewam bikerê.”
Çewlîg
Bi eynî waştişî verê banê HDPyî yê Çewlîgî de zî eşkerayîyêke ameye kerdene. Eşkerayî hetaê Hemserekê HDPyî yê Çewlîgî Veysî Kaya ra ameye wendene. Dima zî banê HDPyî de bi nameyê ”Têkoşînê demokrasî û azadîyan de tecrît û komployî” panelêke ame kerdene. Panelêko moderatorîya ci Songule Barça kerde endamê Heyetê Rayberdişî yê Merkezê DBPyî Mehmet Şîrîn Tunç û endamê Merkezê Partîye yê HDPyî Murat Aydin sey qiseykerdox tewrê ci bîyî. Tunçî tecrîd sey dewamê komployê vera Ocalanî name kerd û vat: ”Bi nê komployî heme merdimîye ameye hedef girewtene. Bi yewbîyayîşî û pîya têkoşînkerdişê şarê ma do komplo pûç bêro vetene.” Aydinî zî qedexeyê pêvînayîşê avûkatanê Ocalanî sey binpaykerdişê heqanê mîyanneteweyî hesibna û vat: ”Ganî no qedexe cadê bêro wedaritene.”
Xarpêt
Xarpêt de zî verê banê HDPyî de eşkerayîya çapemenî ameye dayene. Hemserekê HDPyî yê Xarpêtî Mehmet Kiliçtepeyî ke eşkerayîye de qisey kerd vist vîrî ke Ocalan senî semedê haştîye xîret keno û vat: ”Nizdîbîyayîşê Ocalanî nizdîbîyayîşê meseleya kurdî û demokrasî yo.”
Reyna xeylê bajaranê Kurdîstan û Tirkîya de bi wesîleya serrgêra komployî çalakîyê protestokerdîşî ameyî kerdene û azadîya Ocalanî ameye waştene. DÊRSIM/ÇEWLÎG/XARPÊT
