Rêxistina HDPyî ya Dêrsimî seba ke bale bianco grevê vêşanîye ser çalakîya roniştişî daye despêkerdene. Çalakîya ke vizêr roja hîrêyine de dewam kerde do heta bicaardişê waştişanê xoverdayoxan bêro domnayene
Çalakîya roniştişî ya ke semedê baleantişê grevê vêşanîye yê ke semedê wedartişê tecrîdê serê Rayberê Şarê Kurdî Abdullah Ocalanî yenê viraştene hetê Partîya Demokratîke ya Şaran (HDP) ya Dêrsimî ra ameye destpêkerdene, vizêr roja hîrêyine de dewam kerde.
Parlamenterê Çewlîgî Erdal Aydemîr, hemserek û îdarekarê partîye yê bajarî, temsîlkarê partîyanê sîyasîyan û rêxistinanê sivîlan ê cimatî û wendekarê unîversîte tewrê çalakîye bîyî. Çalakwanan tîşortê Leyla Guvene dayê xo ra û bi laçiganê sipîyan bale ante xoverdayîşê grevê vêşanîye û hêrişê serê Dayîkanê Aşitîye.
Hemserekê HDPyî yê Dêrsimî Hidir Çîçekî vist vîrê ke bi sebebo ka çar kesan Dêrsim de pankarta, ‘Veng bidê cuye wa tecrîd wedarîyo’ tepişto derheqê înan de tehqîqat ameyo destpêkerde û va: “Semedê ma cuyeya merdimî muhîm a. Ma tîya yenê têhet ke wa grevê vêşanîye biqedîyo. No zî heqê ma yo demokratîk o. La semedê yewe pankarte tehqîqat yeno destpêkerdene. Na nêheqîye ya. Ma naye raşt nêvînê. Heta ke grevê vêşanîye dewam bikerê, ma zî do çalakîya xo rê dewam bikerê.”
Parlamenterê HDP’yî yê Çewlîgî Erdal Aydemîrî zî grevê vêşanîye û rojeyê mergî vist vîrî û va: ‘‘Semedê vergirewtişê mergan ganî tecrîd bêro wedartene. Ganî cade waştişê xoverdayoxan bêro bicaardene.‘‘ Bado zî çalakîya roniştişî bi çepikan qedîyaye.DÊRSIM
