Dêrsim de rayberîya rêxistina HDPyî ya Bajarî de çalakîya roniştişî ya vera qeyûman ameye viraştene. Tayî temsîlkarê partîyanê sîyasîyan û Rêxistinanê Cimatê Sivîlî zî paştî daye ci
Dêrsim de çalakîya vera qeyûman yê Amed, Wan û Mêrdînî vizêr zî dewam kerde. Çalakîya ke Meydanê Seyîd Rizayî de ameye viraştene Tayî temsîlkarê partîyanê sîyasîyan û Rêxistinanê Cimatê Sivîlî zî paştî daye ci.
Eşkerayîya hetê vervatoxa Meclîsê Cinîyan yê Partîya Demokratîke ya Şaran (HDP) yê Dêrsimî Nurşat Yeşîle ra ameye wendene. Yeşîle qeyûmî sey derbeyêka sîyasîye name kerdî û va: “Şaredarîyanê Kurdan de caakerdişê qeyûmî eşkera tewirêko dişmenkî yê vera kurdan o. Reyna na polîtîkaya hêrişkare destkewteyanê cinîyan zî hedef gêna. Qeyûmî tewr verî hêrişê sîstemê hemserekîye kenê. Qeyûm îradeyê cinîyan û heme şarê ma xesp keno û no qetîyen nêno qebûlkerdene. Ganî heme hêzê demokratî, partîyê muxalefetî, sendîqayî û dezgehê cimatê sivîlî vera nê îqtîdarî yo ke îradeyê şarî xesp keno, vengê xo berz bikerê.”
Badê eşkerayîye çalakîya roniştişî ameye viraştene. DÊRSIM
