Dêrsim de endamê meclîsî yê ke bi KHKyî gure ra amebî eştene û mazbatayê xo girewtîbî bi hîşyarîya walîtîye, hetê Heyetê Weçînitişî yê Bajarî ra înan ra ame waştene ke pawitişê xo bikerê, endaman vat qerarê YSKyî trajikomik û antîdemokratîk o
Qeraro ke hetê Heyetê Weçînayîşî yê Berzî (YSK) ra derheqê kesanê ke bi Qerarnameyanê Hukmê Qanûnî (KHK) gure ra ameybî eştene girewto hewna zî yeno munaqeşekerdene. Dersim de Hidir Demîr, Ozcan Ateş û Metîn Kiliço HDPyij û Candan Badema TKPyije yê ke bi KHK gure ra ameybî eştene, girewtişê înan ê mazbata ra dima na rey zî rastê astengîya walîtîye ameyî.
Walîtîye derheqê çar kesanê ke hetê YSKyî ra mazbata dîyabî înan de YSKyî ra waşt ke hukmê ‘kesê ke bi KHKyî gure ra erzîyayî nêeşkenê reyna agêrê gureyî’ bêro bicaardene. Nê waştişê walîtîye ser o Heyetê Weçînitişî yê Bajarî Hidir Demîr, Ozcan Ateş, Metîn Kiliç û Candan Bademe rê teblîgat şirawit. Teblîgat de înan ra ame waştene ke mîyanê 7 rojan de bi hawayêkê nûştekîyî yan zî hemverê heyetî de pawitişê xo bikerê.
Endamanê meclîsî yê ke reyna ameyî weçînitene ard ziwan ke hemverê înan de komployêk ameya viraştene û vat gama ke înan sere de seba weçînîyayîşî muracat kerdo Heyetê Weçînayîşî yê Bajarî ra persayo ke hemverê namzedbîyayîşê înan de problemêko qanûnî esto yan nê, heyetî ê wextî vato çino. DÊRSIM
