Hemserekê Pêroyê HDPyî Sezaî Temellî kombîyayîşê nasdayîşê namzendanê hemşaredarîye yê Yewîya Hêzî ya Şorişgêrî ya Dêrsimî de vat ke eke ma pêro pîya xover bidê, ma do tecrîdî bişiknê.
Yewîya Hêzî ya Şorişgêrî ya Dêrsimî bi aktîvîtîyêk namzedê xo dayî naskerdene. Programî bi coşêko pîl dest pêkerd. Hemşaredarê Dêrsimî Nurhayat Altune û Mehmet Alî Bul bi Qerarnameyê Hukmê Qanûnî (KHK) ameyîbî girewtene û cayê înan de qayûm amebi tayînkerdene. Hemşaredarî Nurhayat Altune û Mehmet Alî Bulî û hemşaredara verêne Edîbe Şahîne hepisxane ra peyamî erşawitî û program bi wendişê peyamanê înan dest pêkerd.
Hemserekê Pêroyî yê HDPyî Sezaî Temellî, hetkarê hemserekê Pêroyî ya Partî Alîcan Onlu û Murat Çepnî, parlamenterê HDPyî Alî Kenanoglu û temsîlkarê DBP, Komela Elewîyan a Demokratîke, EMEP, ESP, TÎP û Partîzanî tewrê ci bîyî. Namzedê hemşaredarîye yê Merkezê Dêrsimî sey Nurşat Yeşîle û Hidir Demîr, Qisle de Rahîme Kilizkane û Ozkan Aslan, Xozat de Nesîmî Ataş û Îlknur Dogane, Pulur de Serpîl Argine û Sînan Zenk, Akpazar de Orhan Çelebî û Songul Dogene ameyî bewlîkerdene.
Hemserekê Pêroyî yê HDPyî Sezaî Temellî vat ke ma paştî da yewbînan û Yewîya Hêzî ya Şorişgêrî ya Dêrsimî na ro. Ma do bi na yewîya hêzî qayûman Dêrsim ra gezî bikerê. Temellîyî balê ante tecrîdê Îmraliyî ser û vat ke ma ra venê şima her çî tecrîdî ya gire danê, ma zî vanê ke no welat de her çî pabesteyê tecrîdî yo û heta ke tecrîd mero wedartene melseleyê bînî zî çareser nêbenî. Coka ganî cade tecrîd bêro wedartene.
Temellîyî Leyla Guvene zî silam kerd û heme çalakîyê bînî yê grevê vêşanîyê yê ke zîndanan, Hewlêr, Strasbourg û xeylî cayan bînan de yenî domnayene vist bîrî û vat ke ma do pêro pîya bi xoverdayîş peynîyê tecrîdî bîyarê. DÊRSIM
