Dêrsim de Vîrusê Korona bi lezî vila beno. Hemserekê Sendîkaya Kedkaranê Xizmetê Sosyal û Weşîye (SES) ya Dêrsimî Kahraman Yurukî derheqê Vîrusê Korona de doneyê xo pare kerdî.
Goreyê doneyanê SESî Dêrsim de 330 tenî pê Vîrusê Korona kewtî û 1800 tenan zî nêweşanê Korona rê temas kerd. Yurukî eşkera kerd ke bi îhtîmalêkê pîlî nê 1800 kesan ra 30 kesî zî do pê vîrusî bikewê û bi nê hawayî waqayî vera bizêdîyê. Yurukî da zanayene ke testê Vîrusê Korona yê 10 kedkaranê weşîye zî sey pozîtîf vejîya.
Yurukî vat: ”Înanê ke teberî ra ameyî şaristan de sîrkulasyonêk viraşt. Ganî şaredarîye nê kesan teqîb bikera. Kedkaranê weşîye rê zî bi hawayêkê qîmî test nêno kerdene. Ganî milê kedkaranê weşîye ra barêk bêro girewtene. Ganî Heyetê Weşîye yê Dêrsimî bi hawayêkê sîstematîkî kontrolan bikero. Şarê Dêrsimî zî ganî zêdêr hîşyar bibo, goreyê tedbîranê hîjyen, mesafe û maske têbigêro.” DÊRSIM
