Çalakîya grevê vêşanîye yê bêdem û bêagêrayîşî yo ke tepişteyanê sîyasîyan 27ê teşrîna peyêne de zîndananê Tirkîya û Vakurê Kurdîstanî de vera tecrîdkerdişê Rayberê PKKyî Abdullah Ocalanî û binpaykerdişê heqanê tepişteyan dabî destpêkerdene, roja 56. de dewam kena. Rêxistina Dêrsimî ya Partîya Demokratîke ya Şaran (HDP) semedê bale antişê grevê vêşanîye û binpaykerdişê heqan waşt ke Kuçeya Hunerî de eşkerayîyêke bida. Verê eşkerayî polîsan kuçe girewt binê abluqa û HDPyijî mecbur mendê ke verê bînaya partîye de eşkerayî bidî. Eşkerayîye de pankartê ‘Wa grevê vêşanîye peynî bibo’ û ‘Wa waştişê tepişteyan bêro caardene’ ameyî akerdene.
Vengê hîsgerîye ame dayîş
Eşkerayî hetê Hemsereka Qezayî ya Merkezî Ozlem Toprakî ra ame wendiş. Toprake qiseykerdişê xo de dîyar kerde ke verê cû zî semedê Rayberê PKKyî Abdullah Ocalanî û hemrayê ci yê ke Zîndanê Padaye yê Tîpa Fyî yê Berzî Îmrali de yê, grevê vêşanîye dîyabî destpêkerdene û wina va: “Badê nê grevan tecrîd demêko kilm ame wedartene. 7ê tebaxa 2019î ra nata pêvînayîş nîno kerdene. No caardiş eksê Qeydeyê Nelson Mandela, pêşnîyarê CPT û Qanûnê Înfazî yê Hûmara 5275î yî. Ganî no caardişo teberê qanûnan hetê Wezîrîya Edaletî ra bêro peynîkerdene. Semedê peynîkerdişê nê caardişan û astengkerdişê mergan ê ke zîndanan de bibî, ganî selahîyetdarî lez tedbîran bigêrî û şarê ma hîssin têbigêro.”
Mudaxaleyê polîsan
Eşkerayî de polîsî bi mehneya pankatan de çekuyê ‘Îmrali, tecrîd û grevê vêşanîye’ derbaz benî hêrişê şarî kerd. Pankartî hetê polîsan ra ameyî dirnayene. HDPyijî hêrişan vera mecbur mendê ke dekevî bînaya partî. DÊRSIM
