Dêrsim de bi vengdayîşê Hêzanê Kede û Demokrasîyî bi seyan kesê ke ameyî tehêt vera şerî rayra şîyî. Çalakîye de qeyûmî ameyî şermizarkerdene û mesajê xurtkerdişê mucadeleyî ameyî dayene
Bi wesîleya 1ê Êlule Roja Aştîye ya Dinya Dêrsim de hetê Hêzanê Kede û Demokrasîyî ra rayraşîyayîşêk ame organîzekerdene. Bi seyan Dêrsimîjî tewrê çalakîye bîyî û waştişê aştîye ardî ziwan.
Dêrsimîjê ke Kuçeyê Hunerî (Sanat Sokagi) de ameyî têhet ver bi Meydanê Seyîd Rizayî rayra şîyî. Cinîyanê ke laçigê sipîyî yê ke sembolê aştîye yê antê xo rayraşîyayîşî rê rayberîye kerdî. Pîya bi parlamenterê Parîtîya Demokratîke ya Şaran (HDP) yê Dêrsimî Alîcan Onluyî xeylî temsîlkarê partîyanê sîyasîyan, îdarekarê rêxistinanê cimatê sivîlî û bi seyan kesî tewrê çalakîya rayraşîyayîşî bîyî.
Rayraşîyayîşo ke sloganê aştîye berz bîyî de qeyûmî zî ameyî şermizarkerdene. Dimayê rayraşîyîşî Meydanê Seyîd Rizayî de deqayêk semedê şehîdanê mucadeleyê aştîye rêz ame girewtene. Bado zî eşkerayîyêk ameye dayene. Eşkerayîye de bale ancîya polîtîkayê hêrişkare yê hukmatî ser û rixmê naye ame waştene ke wa seba aştîye gamî bêrê eştene. Reyna qeyûmî zî ameyî şermizarkerdene û ame vatene ke şarê kurdî do bi xoverdayîşî şaredarîyanê xo pêser bigêro.
Eşkerayîye ra dima Alîcan Onlu roja aştîye ya şaran fîraz kerd û semedê xurtkerdişê muceleyî veng da. Çalakîye bi deyîranê hunermend Yilmaz Çelîkî qedîyaye. DÊRSIM
