Dêrsim de Aktîvîstê Xozaye Meydanê Seyît Rizayî de ameyî têhet û bi beyanatê çapemenîye reaksîyon da seydwanan û va: Vizêrî yew gruba seydwanan a 14 kesan teber ra ameya Dêrsim. Nika cêvîya Pilemurîye de seyd de yê û pezkuvîyanê Dêrsimî yê pîrozan kişenê
Qaso ke xebere ameya girewtene, yew gruba seydwanan ameya Dêrsim û na grube de 14 kesî estê. Naye ser Aktîvîstê Xozeye yê Dêrsimî meydanê Seyît Rizayî de ameyî têhet, vera ney qewimîyayîşî reaksîyonê xo bi beyanatê çapemenîye nîşan da û va “Seydwanîye derhal bêro vindertene û heywanê ma nêrê kiştene.“ Beyanat hetê Aktîvîst Haydar Çetînkayayî ra ame dayene.
Dêrsim hetê cuya yabene ra wereyêko muhîm o
Goreyê hayîdarîyanê ke beyanatê Çetînkayayî de ca girewt, Wezaretê Daristan û Awe, her serre menga Adare de kombîyayîşan virazeno û kamcîn bajarî de çiqas heywanî yenê kiştene, qerar danê ci. Nê kombîyayîşan de mintiqayî yenê kifşkerdene û seba ke heywanî bêrê kiştene, îhaleyî yenê kerdene.
Çetînkayayî beyanatê xo de wina va: “Dêrsim hetê cuya yabane ra warêko muhîm o. Weşeqî ra bigê heta kutikê awe, kurbeşikî ra bigê heta heş, pezkuvîyan ra bigê heta koçkek, zerencan, bi seyan çêşidî teyr û tur û heywanê bînî tede ciwîyenê. Xozaya Dêrsimî heta nika bi destanê dêrsimijan ameye şeveknayene û heywanê yabanî pîroz yenê dîyene. La çi heyf ke nê heywanî ewro yenê qetilkerdene.”
Beyanatê çapemenîye ra dima beşdarvanan sloganê sey “Seydwanê qetilkarî, Dêrsim ra def bê, bimbarekanê ma ra destanê xo biancerê” ameyî eştene. DÊRSIM
