Meclîsê Ciwanî yê HDPyî yê Dêrsimî, seba ke bale biancê asîmîlasyon û tîryakî vilawekê ‘Mebe muptela bibe azad’ vila kerdî
Meclîsê Ciwanî yê Partîya Demokratîke ya Şaran (HDP) yê Dêrsimî, seba ke bale biancê serê asîmîlasyon, tîryak û fuhûşo ke mîyanê ciwanan de bîyo vila Kuçeyê Hunerî de eşkerayîyêka çapemenîye da. Eşkerayîya ke parlementera HDPyî ya Amedî Dersîm Dage zî tewrê ci bîye de pankarta ‘Mebe muptela bibe azad, ma rayîr nêdanê tîryak, dizdî, asîmîlasyon û fuhûşî’ amî akerdene.
‘Sîstem ciwanîyêk ke nêfikrêna aferneno’
Endamê Meclîsê Ciwanî yê HDPyî yê Dêrsimî Cengîz Fîdano ke eşkerayîye wende vat bi destê zordaranê Kurdistan û Tirkîya mehla û kuçeyan de ciwanî bi tîryakî yenê jehrkerdene, her wareyê cuye de ciwanan ser o tena zextê fîzîkkîyî nê heman wextî de zextê ruhkî, zihînkîyî û tehdîtî zî estê. Fîdanî vat sîstem wazeno ke ciwanîye mucadeleyê azadîye û demokrasîyî ra dûrî bigêro, bigêro binê serdestîya xo û ciwanîyêk ke nêfikrêna biaferno.
Fîdanî vat înan sey meclîsê ciwan û cinîyan ê HDPyî Tirkîya û Kurdistan de dorê hemleya ‘Mebe muptela, azad bibe’ de cemêyenê û hemverê polîtîkayanê asîmîlasyon, bêkarî û puyayîşî de sere darenê we û veng da ke bi ruhê ciwanîya 68’î cimat xo organîze bikero. Parlementere Dersîm Dage zî ard ziwan ke polîtîkayê asîmîlasyon û puyayîşî xusûsen ciwanan ser o yeno ferzkerdene û vat bi hemleya ke înan hemverê nê de daya destpêkerdene wazenê ke kuçe û mehlayan de ciwananê hişmendan awan bikerê. Eşkerayîye ra dima merkezê şaristanî de vilawekî ameyî vilakerdene. DÊRSIM
