Şubeyê Dêrsimî yê Sendîkaya Kedkaranê Xizmetê Komelkî û Weşîye (SES) seba ke rîskê ke rîyê janê vîrusê Korona ra kedkarê weşîye rî bi rî yê werte ra wedaro û seba ke şar xo biresno xizmetanê weşîye Mudirîya Weşîye reyde pêvînayîşêk kerd.
Şubeyê Dêrsimî yê SESî pêvînayîşî ra dima eşkerayîyêka nuştekîye daye û da zanayene ke înan pêvînayîş de îfade kerd ke ganî prosesê janî bi hawayêkê hesasî û zelalî bêro îdarekerdene. Şubeyî ard ziwan ke ganî meaşê hîrê mengano ke do bêro dayene kedkaranê weşîye, ganî pêro xebatkaranê weşîye rê bêro dayene. Şubeyî Şaredarîya Dêrsimî ra waşt ke pêro hewcedarîyê kedkaranê weşîye bêrê peydakerdene.
Eşkerayîye wina ame vatene: ”Endamê ma yê ke pê KHKyî wezîfe ra ameyî girewtene wazenê ke nê prosesî de bi hawayêkê zerrîwazî bixebitê. Hetê bînî ra şaristanê ma de Heyetê Çimdarîya Pandemî ame ronayene. Ganî ma bibê parçeyê nê prosesî û proses pîya îdare bikerê û seba ke ma merdiman bidê ciwîyayene biciwîyê.” DÊRSIM
