Serkêşîya Platformê Kede û Demokrasî yê Dêrsimî de, Meydanê Seyîd Rizayî de derheqê serrgêra 86. ya Terteleyê Dêrsimî de eşkerayîyêke dîyaye. Namzeda Partîya Çep a Keske ya Dêrsimî Aytene Kordu, hemsereko verên ê Baroyê Amedî Cîhan Aydin, pabesteyê Îtîfaqê Kede û Azadîye, Hemserekê Komeleyanê Elewîyan ê Demokratîkan (DAD) Kadriye Dogan û Musa Kulu, temsîlkarê dezgehanê elewîyan, Pîr û Dedeyî tewrê eşkerayîye bîyî.
Nameyê platformî ser o Serekê EMEPî yê Dêrsimî Ergîn Tekînî metnê eşkerayîye wend. Tekînî bale ante tarîxê qirkerdişî ser û vat ke qirkerdiş hema zî dewam keno.
Tekînî dewamê eşkerayîye de nê waştişî rêz kerdî;
”-Wa bi hawayêkê fermîyî uzr bêro waştene
-Wa arşîvê serê 1937-1938 bêrê akerdene
-Wa seba îadekerdişê îtîbarê heqanê merdimanê vînîbîyayeyan eşkerayîyêka fermîye bêra dayene.
-Wa kesê vînîbîyayeyî (doman, cinî, kokimî) bêrê cigêrayene û nasnameyê kesanê qetilkerdeyan bêrê cigêrayene.
-Wa nameyê Dêrsimî û nameyê cayanê bînan bêrê îadekerdene.
-Wa cayê gorê Seyîd Rizayî û embazanê ey bêrê eşkerakerdene.
-Wa Terteleyê Dêrsimî sey ‘jenosîdî’ bêro şinasnayene.”
Tekînî ra dima Hemserekê Pêroyî yê DEDEFî Ozkan Tacerî, Pîr Zeynel Keteyî, Serekê PSAKDyî Cuma Erçe, Serekê ABFyî Mustafa Aslanî û Namzeda Partîya Çep a Keske Aytene Kordu qisey kerd.
Qiseykerdişan de ame vatene ka ganî dewlete Terteleyê Dêrsimî de têrî biba û wina ame parekerdene: ”Ma Terteleyê Dêrsimî xo vîr a nêkerd, ma do nêverdê ke vîran ra şoro. Ma do seba îadekerdişê nameyê Dêrsimî bixebitê.” DÊRSIM
