Endamê Komîteya Zîndanan a PKKyî Pîro Dêrsimî beşdarê bernameyê taybetî yê Radyoyê Dengê Gel bi û derheqê îşkenceyê ‘girêyê xozî’ yê Zîndanê Patnosî de ercnayîşî kerdî.
Pîro Dêrsim qiseykerdişê xo de nê noqtayan ser de vindert:
”Rayberê ma 25 serrî yo binê tecrîdêkê giranî de yo. Ma hê kewenê serrgêra 25. ya Komployê 9ê Teşrîna Verêne. Wextê komployî embazanê ma yê zîndanan bi şîarê ‘Şima nêeşkenê tîja ma tarî bikerê’ çalakîyê fedayîyî kerdî. Rayber Apo seba ke pozîsyonêkê xurtî de yo yeno tecrîdkerdene. O Îmrali de hucreyê yewkesî de tepişîyeno ke fikrê ci vila nêbê. Teyna dewleta tirke ney hêzê mîyanneteweyî zî tecrîdî anê ca. CPT Îmrali zîyaret keno la derheqê zîyaretan de eşkerayîyêke nêdano.
Dewleta tirke armanc kena ke qirkerdişê kurdan temam bikera û têgêrayîşê ma tasfîye bikera. Coka nê tecrîdê Îmraliyî vera vera giranêr kena. Ganî her kes vera tecrîdî têkoşîn bikero. Ganî ma bikerê ke Rayber Apo azad bibo. Ganî ma Hemleya Wextê Azadîye bivisnê asta tewr berze û bi şerê şarî yê şorişgêrî azadîya Rayber Apoyî bivisnê destî. Ez pê bawer a ke serrgêra Komployê 9ê Teşrîna Verêne de ma do netîceyêka xurte bivisnê destî. Wa her kes kêmasîyanê xo raşt bikero û seba servistişê nê prosesî têbigêro.
Zîndanan de hêrişê her hewayî est ê. Zîndanê Patnosî de vera embazanê ma yê cinîyan îşkenceyê ‘girêyê xozî’ ameyo kerdene. No metodê îşkenceyî metodêko newe yo. Wexto ke qiseyê girêyê xozî yeno kerdene Hîzbulkontra yeno vîrê kurdan. Nika îtîfaqê AKP-MHP-Hîzbulkontrayî est o. Persa ‘Gelo wextê verê ma de hîzbulkontrayî do zîndanan de bêrê cakerdene û vera embazanê ma bişuxilîyê?’ yena vîrê merdiman.
Averberdişê çalakîyanê komelkîyan ê demokratîkan de kêmasîya ma est a. Eke ma vera kerdişan, teda û îşkenceyê zîndanan xeta raşte de têkoşîn aver berdêne nê îşkenceyî do nêameyêne kerdene. Ganî rêxistin, kesayet, dezgeh û sazgehê demokratîkî bêrê têhet, vera tecrîdî û îşkenceyan vengê xo vejê. Ganî pratîkê zîndanan qetî nêrê qebulkerdene.
Tirkîya de ferqê zîndanan û teberî nêmendo. Şar binê tedayêka pîle de ya. La eke ma tecrîdê vera Rayber Apoyî û zulmê vera zîndanan bişiknê ma do faşîzmî zî bin bikerê. Ma têkoşînê cuya demokratîke kenê. Coka ganî her kes mîyanê nê têkoşînî de cabigêro. Ganî pêro welatperwer, roşnvîr, hunermend, kesayet, sempatîzan û wayîrwijdanî nê prosesî de vera faşîzmî bi aktîfî cabigêrê.” BEHDÎNAN
