Dêrsim de pawitoxanê heqan bi wesîleya Hewteyê Heqanê Merdiman de verê Vîrdarîya Heqanê Merdiman de eşkerayîya çapemenîye kerde. Çalakîya ke temsîlkarê partîyanê sîyasîyan û dezgehanê rêxistinê sîvîlî tewre ci bîyî de Serekê Komeleya Heqê Merdiman (ÎHD) yê Dêrsimî Gurbuz Somazî eşkerayîye wende.
Eşkerayîya bi sernameyê merdim/e bi heqanê xo merdim o/a, heqê merdiman nefes danê girewtiş ameye kerdene de nê ameyî vatene:
Meseleya heqanê merdiman û demokrasîyî Tirkîya de her roje hîna pîlêr bena. Îqtîdarî janê Korona zî sey firsendêkî şuxulna û pîya bi şertenê OHALî komelî ser o zextî zêdînayî ke bigero binê kontrolê xo. îqtîdar ekonomî ra heta weşîye heme meseleyanê welatî sey meseleya asayîşî geno dest. Komelî yewbînî ra qerfneno û hem zere de hem teber de şîdetî esas geno. Bitaybetî zî meseleya kurdî û meseleyanê mîyanneteweyî de têna metodê pêkewtiş û şerî şuxulneno. Coka welat de heqê merdiman yenê bipaykerdene. Hem pê destê dewlete hem zî seba ke dewlete wezîfeyê xo nêard ca û hemwelatîyê xo nêpawitî, netîceya şîdetî de xeylêk kesan cuya xo vînî kerde.
Xora zîndanan de rewşe hîna xiraba. Tepişteyan rê îşkence yeno kerdene û mergî rê yenê caverdayene. Eke raşta yeno waştene ke reform bêro kerdene wa qanûno bingeyî newe ra bêro bedilnayene ke demokrasî tede cayê xo bîgero. Wa xeletanê verênan de bêro têrî ke xetayê neweyî nêrê kerdene û prosesê çareserî bêro destpêkerdene. Bê nê gaman reform nêbeno. Ma semedê haştîye, adalet, seyyewbînîye û azadîye mucadeleyê xo rê dewam kenê. Têna bi wayrîvejîyayîşê nê ercan ma eşkenê krîzê globalî ke estbîyayîşê merdimîye tehdît kena, ra vejîyê. DÊRSIM
