Sazîyê Elewîyan û komeleyê cayîyan derheqê qerarê vurnayîşê nameyê Tûncelîyî bi Dêrsimî eşkerayîyêk dayî. Eşkerayî de wina ame vatene: “Hêrişo ke hemverê nameyê Dêrsimî de yeno kerdene, hemverê estbîyayîşê ma yê cimatkî û heme ercanê ma yê merdimîye de yeno kerdene.”
Sazîyê Elewîyan û komeleyê cayîyan derheqê qerarê meclîsê şaredarîye yê 7ê Gulane de ke vatibi tabelaya ‘Şaredarîya Tûncelî’ bêro wedartene û herinda ci de ‘Şaredarîya Dêrsimî’ bêro bicakerdene eşkerayîyêk daye.
Eşkerayîya ke banê Komeleyê Elewîyan ê Demokratîkî yê Şûbeyê Enqereyî de amî dayene rê temsîlkarê Merkezê Pêroyî yê Federasyonê Komeleyanê Dêrsimî, Platformê Vîrî yê Dêrsim 37-38î, Merkezê Pêroyî yê Komeleya Kulturî ya Pîr Sûltan Abdalî, Komeleya Kulturî ya Dîvrîgî ya Anqaraye û Komeleya Vartoyijan ya Anqaraye beşdar bîyî.
Eşkerayîya hempare hetê Alî Ekber Çîçekî ra amî wendene û nê ameyî vatene: “Seke yeno zanayene bi destê Îttîhat û Terakkîyî hemverê şaranê kanan ê na coxrafya de wehşet ameyo kerdene, xelqaya peyêne ya na zincîra wehşetî zî Dêrsim de amîya bicaardene û Dêrsim açarîyayo gola gonî. Netîce de seba ke vîrê şarî bêro çinkerdene nameyê Dêrsimî sey Tûncelî ameyo vurnayene. Bi nameyê Tûncelî ameyo waştene ke estbîyayîşo cimatkî yê Dêrsimijan, vîrê înan o tarîxî bêro esteritene. No nizdbîyayîş çimê Dêrsimijan de fehmêko Nemrûdî yo û tu meşrûîyetê ci çino.
Meclîsê Şaredarîya Dêrsimî goreyê waştişanê û pawitişanê şarê ma 7ê Gulane 2019î de kombîyayîş de qerar dayo ke tabelaya şaredarîye sey Şaredarîya Dêrsimî bivurno. Şarê ma zî bi nê qerarî kêfweş bîyo û paştî daya nê qerarî. La zihnîyeto îttîhatperwer nê qerarî ra nêrehet bîyo û dest bi kampanyayêka lînçî kerda. Ma veng danê ke wa birînanê ma hîna zaf nêkerê xorî. Zerrîya ma hîna zaf nêdejnê. Fek dişmenîya Dêrsimî ra vera bidê. Eke şima nê tewirê xo ca nêverdê, ma do zî her ca de nê vatişanê şima yê nijadperest û cîyakaran teşhir bikerê.” DÊRSÎM
