Endamê Komîteya Zîndanan a PKKyî Pîro Dêrsimî cewab da persanê ANFyî û xoverdayîşê tepişteyanê sîyasîyan ercna.
Pîro Dêrsimî pare kerd ke 2015î ra nata 8 serrî yo vera têkoşînê azadîye bi her hawayî hêrişî ameyê kerdene û ameyo waştene ke têkoşînê azadîye bêro tasfîyekerdene.
Dêrsimî vat: ”Rixmê nê hêrişan zî bi xoverdayîşê Rayberê ma yê zîndanî û tewirê embazanê ma yê zîndanan û gerîlayan, bi têkoşînê şarê ma faşîsm her ca de ame binvistene. Erdlerzî zî bi zelalî eşkera kerd ke faşîzm resayo kamyew aste û werte de mekanîzmayêka dewlete nêmenda. Nê îqtîdarî pêro estbîyayîşê xo çinkerdişê kurdan ser o nayo ro û tede dizîye, bêusûlîye û neheqîye ra ber çîyêk çin o. Têkoşînê şarê ma û partîya ma senî ke peynîya nê îqtîdarî arda, nê weçînayîşan de zî do bibo dîyarker. Şarê ma, hêzê demokratîk û sosyalîstî zî nê weçînayîşan de rolê xo do bîyarê ca û nê îqtîdarê talanker û kanwazî bin bikerê. Caardişê azadîya Rayberîya ma, dewamkerdişê paştdayîşê bi mexdûranê erdlerzî, binvistişê polîtîkayanê vera kurdan û binvistişê hêzê artêşa tirke bi binvistişê nê îqtîdarî mumkîn o. Coka ganî rojdemêkê ma yo bîn nêbo.
Faşîmê AKP-MHPyî hêverî Îmrali de bi xoverdayîşê Rayber Apoyî bin kewt û bi xoverdayîşê embazanê ma yê zîndanan zî polîtîkayê teslîmgirewtişî pûç bîyî. Embazanê ma yê tepişteyan nê 8 serrî yo zîndanan de bi fedayîtî xo ver da û nêverda ke xeta faşîzmî ya Darbeya 12ê Êlule zîndanan de ser bikewa. Nika seba binvistişê zulmê zîndanan verê ma de firsendê weçînayîşan est o. Şarê ma, merdimê tepişteyan ganî bi hişmendî nêzdîyê nê prosesî bibê û erkanê xo bîyarê ca.
Ewro zîndananê Tirkîya û Vakurê Kurdîstanî de seba şiknayîşê îradeyê tepişteyan û teslîmgirewtişê înan bi her hawayî rayîr û metodî yenê ceribnayene. Tecrîdê Îmraliyî pêro zîndanan de yeno caardene. Bi tecrîdî vera tepişteyan şero taybet yeno kerdene û yeno waştene ke hêvîya înan wa bêra şiknayene. Reyna surgunkerdiş, cigêrayîşê rûtî, sereştişê koxûşan, taloqkerdişê înfazan, ferzkerdişê poşmanîye ûsn. dewam kenê. Nê serran de çend embazê ma zîndanan de ameyî qetilkerdene. Prosesê erdlerzî de zî embazê ma ameyî surgunkerdene, îşkence dî, raştê tecrîdî ameyî. Rixmê nê kerdişan zî embazanê ma xoverdayîş û têkoşînî ra fek vera nêda. Embazanê ma her wextî de û her şertî de rolê xo yê xoverdayîşî ard ca.
Nê prosesê weçînayîşî de ez venga embazanê ma yê zîndanan dana ke wa bi aktîfî tewrê prosesî bibê, keye û embazanê xo rêxistin bikerê. Sere de keyeyanê tepişteyan ez venga şarê ma dana ke seba binvistişê îqtîdarê AKP-MHPyî wa seferber bibê. Ganî her kes keye, derdor, tax û dostanê xo ra 3-5-10 kesan îqna bikero û rayanê înan qezenç bikero. Ez venga pawitoxanê heqanê merdiman dana ke wa tepişteyan teyna meverdê, wayîrê înan vejîyê û verê pêro neheqî û îşkenceyan bigêrê. Nê babetan de xora xebatê înan ê rindî est ê la qîm nêkenê. Ma serkewtişê mutlaqî xo rê bikerê esas û ameyoxêkê azad-demokratîkî awan bikerê. Nê esasî ser o ma her kesî rê serkewtiş wazenê.”
