Devlet Bahçelî têkildarî biryara Meclisa Şaredariya Dêrsimê ya ji bo guherandina navê ‘Tuncelî’ yê, gef xwar. Bahçelî navê Dêrsimê yê bi hezaran salan red kir û îdia kir ku bajarekî wisa nîne
Li Şaredariya Dêrsimê bi piraniya dengan biryar hate girtin ku tabelaya şaredariyê ku weke ‘Şaredariya Tunceliyê’ hatibû nivîsandin weke ‘Şaredariya Dêrsimê’ bê guhertin. Li ser vê biryarê jî tabelaya şaredariyê weke Şaredariya Dêrsimê hate guherandin. Lê vê guhertinê di serî de derdorên kemalîst ku gelemperiya wan di hilbijartinê de Maçoglu destek dikir û gelek derdorên nîjadperest aciz kir.
Ji rojnameger Fatîh Portakal heta gelek derdorên bi awayeke raste rast serokê Şaredariya Dêrsimê Mehmet Fatîh Maçoglu hedef girtin û bertek nîşanî vê guhertinê dan. Ev guhertin di heman demê de rojeva serokê MHP’ê Devlet Bahçelî de jî bû. Bahçelî têkildarî mijarê daxuyaniyeke nivîskî weşand û gef li meclisa şaredariyê xwar.
Daxuyaniya Bahçelî wiha ye: “Em biryara guhertina navê Tûnceliyê ya tabeleyên şaredariyê ya bi navê Dersimê nas nakin. Di bin pêyê me de ye û divê çi pêwîst dike bê kirin. Bajarekî bi navê Dersim li Tirkiyeyê tuneye û dê çênebe jî. Divê kes ji deng û piştgiriya ku girtiye bawer nebe.” ENQERE
