Weçînayîşê serekkomarî û pêroyî ke do 14ê Gulana 2023î de pêro rê demêk kilm mend. Namzed eşkera bîyî û her bajarî de xebat yena rayraberdiş. Nê bajaran ra yew zî Dêrsim o.
Namzeda tewr xurt ya Namzeda Partîya Çep a Keske ya Dêrsimî Ayten Korduye ya. Yê CHPyî Husnîye Karakoyun a, yê MHPyî Nîlgun Dalkiliç û yê AKPyî zî Hakan Ozerî yo. Seke tesilî bibo ewnîyayîş esto ke namzeda Partîya Çep a Keske Ayten Korduye şêra meclîs.
Seba weçînayîşo ke hirê cinî û camêrdêk têkoşîn danê, cinîyê Dêrsimî qisey kerd.
‘Partîya Çep a Keske partîya azadîye ya’
Aygul Arase dîyar kerd ke ganî êdî îqtîdarê AKP-MHPyî şêro û vat ke ê do paştî bidî Partîya Çep a Keske. Aygule wina dewam kerd: “Partîya Çep a Keske partîya azadîye ya. Partîya edalet û demokrasîye ya. Partîya her kesî ya. Êdî bes o. Ciwanê ma ameyî tepiştiş û ameyî surgunkerdiş. Ez 65 serrî ya. Ez hesretê ziwan, kultur û herra xo de ya. Êdî bes o, jin jiyan azadî.”
Cinîya bi nameyê Sevîm Saglmame zî da zanayîş ke hêvîya aye ya weçînayîşî ra no yo ke sey nasname bêrê qebulkerdiş û wina domnaye: “Wa ma azad bibê. Hedefê ma no yo ke ma qezenc bikerê. Wa tutê, ma û herra ma, ma azade bicuwiyî. Ma wazenê ke qedexe çinî bo. Seba azadîye ma vanê ke Partîya Çep a Keske.”
‘Ma paştî danê’
Şengul Perke zî derheqê namzedanê cinîyan yê Dêrsimî de nê çîyan ard ziwan ser: “Namzeda ma cinîya ma û no seba ma xeylê muhîm o. Demêk dergo ke Dêrsim de namzedêka cinî nêameybî mojnayîş. Ma xeylê kêfweş bîyî. Ma paştî danê.”
‘Ma ci ra bawer kenê’
Derya Ozale zî kêfweşîya xo ard ziwan ser û vat ke yewine waştişê înan azadîya Kurdan o û Kurd wa êdî azadîya xo dest bifînê.
Cinîya bi nameye Dîrene zî dîyar kerd ke Dêrsim de qezenckerdişê cinîyêke xeylê muhîm o û wina dewam kerd: “No do seba şarê Dêrsimî xeylê baş bibo. Nê welatî de her roje cinî yenê qetilkerdiş. Ma nêwazenê bimirê. Namzeda Partîya Çep a Keske do biba cewabê waştişanê cinîyan.”
Besîme Goke nê çîyan vat: “Ma seba ke namzeda ma cinîya xeylê kêfweşin ê. Ma do dormeyê aye de bibê xelek û ser bikewê. Bedilnayîş do bi cinîyan bibo. Cinîyê Dêrsimî serkewte yê. Ma do bi namzeda xo reyde ser bikewê.”
Cinîyan bi nameyê Leyla Arslane zî dîyar kerd ke do sey cinîye ser bikewê û bîyayîşê cinîyan bimojnê înan. DÊRSIM
