Li gorî lêkolînekê Derya Spî deryaya herî qirêj a Ewropayê ye. Di nava sih salên dawî de sergo ya li Derya Spî bi sê qatî zêde bûye.
Enstîtuya Lêkolînên Karên Deryayê yên Fransayê (Ifremer) der barê sergoya li Derya Spî ya navbera salên 1994 û 2017’an de lêkolîneke berfireh kir. Di lêkolînê de hate ragihandin ku rêjeya sergo ya li Derya Spî her sal cuda jî be ji sala 2009’an û vir ve zêde dibe.
Di lêkolînê de hate ragihandin ku çop bi giranî ji kîsên plastîk, şûşeyên plastîk, şûşeyên metalîk, ambalajên xwarinê, benên sentetîk, torên masîgiran û cilan pêk tê. Plastîk bi tena serê xwe ji sedî 60’ê sergoyê ye.
Di lêkolînê de hate tespîtkirin ku ji sala 1990’î û vir ve sergoya li Derya Spî bi sê qatî zêde bûye.
Yekîtiya Ewropayê beriya çend mehan biryarek wergirtibû û diyar kiribû ku ji sala 2021’ê û pê ve berhemên plastîk ên ji bo carekê tên bikaranîn wê qedexe bin. Lê belê tê gotin ku ji bo bandora vê yekê bê dîtin pêwîstî bi demê heye.PARÎS
