Hepsîyê Zîndanê Afyonkarahîsarî Mehmet Alî Kayanî vat: “Îşkence bi ma ame kerdene; dest û lingê ma ameyî şiknayene.” Kayanî îfade kerd ke îşkenceyê falaka yê bi tay tepişteyan ame kerdene
Mehmet Alî Kayan (32) serra 2015î de qezaya Derîkî ya Mêrdînî de bi îdîaya ”endamîya rêxistine” ameye tepiştene û ci rê cazaya 11 serr û 6 menge ameye dayene. Goreyê xebera MA Kayanî da zanayene ke zîndan de îşkence bi ey ame kerdene.
Kayan bi rayîrê telefonî keyeyê xo rê qala îşkence û binpaykerdişê heqan kerde.
Kayanî ard ziwan ke tepişteyî zîndan de maruzê cigêrayîşê zûtî benê û payî ra yenê hûmarene. Goreyê vatişanê Kayanî gardîyanî tepişteyan rê gef wanenê û tepişteyan rê destûr nêno dayene ke heqê televîzyon, radyo û rojnameyî bixebitnê. Wexto ke tepişteyan vera nînan nêrazîbîyayîşê xo mojna gardîyanan eşt koxuşanê înan ser û hêrişê tepişteyan kerd. Netîceyê nê hêrişî de dest û lîngê tepişteyî ameyî şiknayene, îşkenceyê falaka bi tay tepişteyan ame kerdene.
Babî Mahmut Kayanî (61) vat: ”Eke domanê ma bêrê kiştene tewr ma pê nêsîyenê.” Babî Kayanî venga rayaumûmîye da ke hîsgerî biba.
Dadîye Sultan Kayan (59) zî seba ke lajê ci ame erşawitene zîndanêkê dûrî nêrazîbîyayîşê xo mojna û vat ke ê nêeşkenê şorê pêvînayîşan. MÊRDÎN
