Çarçewa Serdozgerîya Komare ya Anqara de ewro Anqara, Îstanbul, Wan, Amed, Riha û Mêrdîn de polîsan eşt xeylêk keyeyan ser û buroyê Anqara yê Ajansê Mezopotamya (MA) ser. Sereştişan de Mudira Karanê Nuşteyî ya MA Dîrene Yurtsever, muxabîrê MA Selman Guzelyuz, Zemo Aggoz, Denîze Nazlim, Selman Guzelyuz, Berîvane Altan, Hakan Yalçin, Emrullah Acar û Ceylan Şahînlî ameyî destbendkerdene. Muxabîrê JINNEWSî Habîbe Eren, Oznure Deger û Derya Ren zî ameyî destbendkerdene.
Goreyê agahîyan Derya Ren tehqîqatêkê cîyayî ra ameya destbendkerdene. Derheqê dosyaya rojnamegeran de bira nimite dîyaye. Rojnamegerî nêzanenê ke pê çita yenê sûcdarkerdene.
Dîya zanayene ke rojnamegerê destbendkerdeyî do bêrê berdene bi Anqara. Rêxistinanê rojnamegerî vera operasyonê serê rojnamegeran wina nêrazîbîyayîşê xo mojna: “Komeleya Rojnamegeran a Dîcle-Firatî (DFG): Endamê komeleya ma yê muxabîrê MA û JINNEWSî serê sibayî ameyî destbendkerdene. Ma nê operasyonanê bi armancê bêvengkerdişê rojnamegeran şermezar kenê. Çapemenîya azade pê nê hêrişan do nêra binvistene. DÎSK Basin-ÎŞ: Endamê ma zî tede xeylêk rojnamegerê JINNEWSî û MA serê sibayî ameyî destbendkerdene. Ma prosesî teqîb kenê. Rojnamegerîye sûc nîya. Embazanê ma vera bidê!”
Platformê Cinîyan ê Rojnamegeran ê Mezopotamya (MKGP): “Polîtîkayê teda kenê ke rojnamegeran bigêrê binê kontrolî. Ma vizêr zî vat ewro zî vanê: Şima nêeşkenê rojnamegeran bêveng bikerê. Nê polîtîkayê teda û qelskerdişî do nêresê armancê xo. Ma do nuştişê raştîyan ra fek vera medê. Destê xo serê rojnamegeran ra biancê. Qanûn û tepiştişê şima do pê rojnamegeran nêeşkê.”
Sendîkaya Rojnamegeran a Tirkîya: “Nê rojan de ke qanûnê sansurî dewre de yo, xeylêk rojnamegerî pê operasyonanê sereştişî ameyî destbendkerdene. Embazanê ma rê ame qedexekerdene ke avûkatanê xo bivînê. Şima do nêeşkê pê nê kerdişan rojnamegeran krîmînalîze bikerê.” AMED
