Bi sedan şêniyên Qamişloyê ji ber şewata ku li Girava Îmraliyê derketî û ji bo agahdarbûna ji rewşa Rêberê Gelê Kurd Abdullah Ocalan, meşek li dar xist. Meş li Kolana Mûnîr Hebîb dest pê kir. Di meşê de çalakvanan pankartên ‘Azadî ji bo Rêber Apo’, ‘Divê parêzer bi lezgînî biçin Îmraliyê’, ‘Destê ku dirêjî Rêberê me dibe, em ê bişikînin’ û wêneyên Ocalan rakirin. Di meşê de nûnerên rêveberiya xweser, Kongreya Star û saziyên civaka sivîl jî amade bûn.
Meş li pêşiya avahiya Komîseriya Kar û Barên Penaberan a Neteweyên Yekbûyî (NY) veguherî mîtîngê. Di mîtîngê de endama Koordînasyona Kongreya Star Hediya Şemo ji ber şewata li Îmraliyê derketiye, dewleta tirk şermezar kir û wiha got: “Em îro dibînin bê ka gelê me çiqas girêdayî serokê xwe Abdullah Ocalan in. Dewleta tirk her dem li ser Rêber Ocalan siyaseteke qirêjî dimeşîne. Ev şewat berdewamiya Komploya 15’ê Sibatê ye. Rêber Apo ev 21 sal in di Girava Îmraliyê de li ber xwe dide. Tevî hemû zextan jî Rêber Apo paşvegav neavêt. Bi fikr û projeyên xwe di her kêliyê de di nava gelê xwe de ye.”
Komplo şermezar kir
Paşê endamê Meclisa Giştî ya Partiya Yekitiya Demokratîk (PYD) Ebdulkerîm Sarûxan axivî û ev tişt anî ziman: “Em li ser navê hemû gelên Bakurê Sûriyeyê, komploya ku Rêber Abdullah Ocalan hedef girt şermezar dikin. Em bi bîra dewleta tirk dixin ku tu destê ku dirêjî rêberê me dibe, dê ji aliyê kesên ku daxwaza demokrasiyê dikin ve werin cezakirin. Em nahêlin ku tu kes ku destê xwe dirêjî rêberê me bike.”
Sarûxan bang li rêxistinên mirovî û CPT’yê kir ku xwedî li Ocalan derkevin û got ku gel êdî tehemûla rewşa heyî nake. QAMIŞLO
