Tirkîya de, no rejim her roj yew qrîz vejîno. Aseno ke no sîstem, xo bi xo qrîzan vejeno. Hetan eyro Tirkîya nêdekewta rewşa tebîîyî. Hetan sîstem demokratîze nêbo, nê qrîzê heme wext vejînê.
Eke Meclîs de heqê destnêpanayîşê wekîlanê HDPyan hewanîyo û Meclîs ra bêrê vistiş; hinê fonksîyonê Meclîsê Tirkîya nêmaneno. Demokrasî, heq, huqûq nêmaneno. Yewna het ra hinê Rejîmê yew merdimî, bi temam hakim beno. Ewta de hedef tena wekîlê HDPyî nîyê, hedef; rijnayîş û zeîfkerdişê partîyanê mûxalîfan o. Amanc dizaynkerdişê sîyasetî yo, tahkîmkerdişê rejîmê yew merdimi yo. AKP mîyan de munaqeşeyanê fikran çin o, rexne û xorexne çin o. Zaf vengey û zaf renginey esla qebul nêveynîna. AKP mîyan de şef çi vajo, ay çîy beno. Şef se ra se îtaet wazeno. No zîhnîyet merdimanê xo zî weno. Mesela rewşa Fethullahîyan raşte de ya. Mesela rewşa Ahmet Dawutoglu û Bulent Arincî û Serekkomarê verê Abdullah Gulî orte de ya. Xora Recep Tayîp Erdogan, partîya xo de zaf bawerîya yewerî nêkeno. No semed ra partîya xo mîyan de, merdimanê xo organîze keno.
Eke heqê destnêpanayîşê HDPyan ser ra hewanîyo û wekîlê HDPyî Meclîsê Tirkîya ra bêrî vistiş, hêvîya kurdan bi Meclîsê Tirkîya nêmanena. Xora heme çîy çiman ver de yo, wekîlê kurdan, hetan eyro se wekîl nêhesibnîyaynî. Her yew wekîlê HDPyî bi des hezaran rayê girewtê. Meclîs ra vistişê wekîlanê HDPyî, meclîs ra sîstem ra derkenarkerdişê îradeyê kurdan o. Şarê kurdan esla no tewir yew qerar qebul nêkeno. Hinê eşkara beno ke hukmat û dewleta Tirkîya kurdan û wekîlanê kurdan nêwazenê. Heta semedo ke raya xo daya HDP, weçînayoxanê HDP sucdar kenê. Bi no têgeyrê înan, edebîyatê birayey zî veng de vejîno. Eşkara yo ke edebîyatê biryey yew diriyey ya.
Semedo ke îqtîdarê AKP/MHP, weçînayoxanê xo konsolîde bikê; yan dînê Îslamî û nîjadperestey şuxulnenê, yan zî polîtîkaya cengawerey dekenê dewre. Û hêrişê/gala kurdan kenê. Yewna het ra kurdî ke sîyaseto demokratîk kenê, dekenê zindanan. Yewna het ra wazenê ke wekîlanê HDPyî meclîs ra fîynê. Yewna het ra zî wazenê ke; Partîya HDP biqefilnê. Yanî semodo ke îqtîdar de bimanê; heme tewir argûmanan dekenê dewre. La yew wext yeno ke bi nê argumanan nişnê şaranê Tirkîya bixapînê. Çunku Tirkîye de, bi des mîlyonan merdimê bêîş û bêgure estê. Veyşaney û xizaney çok ra ya. Wexto ke tencere nêgirîyo, pey propgandaya cengawerey, pey polîtîkaya înkar û îmhayî pey nîjadperestey û şuxûlnayîşê dînê îslamî, no şar nêxapîno.
HDP hewnanê înan herimnena. Wazenê ke bi yew kerra, di teyran fîynê. Ay yewin, wazenê ke, sîyaseto demokratîk de, HDP marjînalîze bikerê û weçînayoxanê xo bipawê. Ay dîyin Tifaqa Komarî rê bexçeyê gulanê yo bêtelîyan awan bikê/bikerê. Bi no hewa, mûxalefet zeîf beno û Recep Tayyîp Erdogan sîyaset de yew nefeso rehet/asan gêno.
Eyro ma hewnênê ke, kontr-gerîlla, Ergenekon, Partîya Perînçekî, JÎTEM, Tîma Xencerî, Tîma Esedûllahî, MHP, mafya, reng û nameyê înan çi beno wa bibo, înan û AKP; vera kurdan û HDPyî de pêkerdo. Aseno ke Partîya ÎYÎyî zî no fezleke de, destek dana Tifaqa Komarî. No cephe nêwazeno kurdî sîyaset bikerê. Tirkîya de demokrasî-memokrasî hinê qalan de mendo. Bi no hewa weçînayîş zî bêmana beno.
Verî zî AKP û MHP bîyê yew û CHP zî destek da û vernîya destnêpanayîşê HDPyîyan akerd. Hemserekê HDPyî yê verî Selahattîn Demîrtaş û Hemsereka HDPyî ya verî Fîgen Yuksek Dage tede, bi desan wekîlê HDPyî meclîs ra vistê û dekerdê zîndanan. Raydayîşê nê Teskereyî de, Kemal Kiliçdarogluyî vat ke; “Teklîfê AKP yo destnêpanayîşî, tersê Qanûnê Bingeyî bibo zî ma eya vanê.” Kiliçdaroglu û CHP no derbeyî rê bîyê destek. Kiliçdarogluyî ewta de yew xetaya tarîxî kerda. No zîhnîyetê AKP/MHP, yew roj sereyê CHP zî weno. HDP dima sira yena CHP. Siba kamî rê bilet birêno, bellî nîyo.
Hewce keno ke mûxalefet, Tifaqa Komarî rê nêbo alet, nê kayî/oynî biherimno. La çi heyf no xusûs de, vindertişo tîk/dîk çin o. Aseno ke no xusûs de mîyanê Tifaqa Miletî de yewey çin a. Hetan eyro Tifaqa Komarî û Recep Tayyîp Erdoganî waştênî ke, Tifaqa Miletî lete-lete biko. Wazeno ke no waştişê xo, HDP ser ra pratîze keno.
