Roja verêne ya Vîrusê Korona ra nata Tirkîye de bala her kesî şîye zîndanan ser. Îqtîdarê AKP-MHPyî qanûnêkê 70 madeyan amade kerd. Rixmê vengdayîşanê muxalefetî zî tepişteyê sîyasîyî û rojnamegerî tewrê nê qanûnî nêkerdî.
Tepişteyanê zîndananê Herêma Marmarayî pê rayîrê keyeyanê xo qala meseleyanê zîndanan kerde. Tepişteyan derheqê rewşe de nê zanayîşî dayî:
* Zîndanê Edîrne de Cevher Ay nêweşê Koahî û qelbî yo. Ay wedarîya nêweşxane labelê nêame dermankerdene û pê dejê xo erşawîya zîndanî.
* Zîndanê Bolu de odayî bi hawayêkê holî nênê dezenfektekerdene. Sabun û deterjanî ra berî malzemeyê pakîye nêdîyenê. Deterjan zî şuşeyê awe yan zî çayî de dîyeno.
* Zîndanê Akhîsarî de Ridvan Çelîk pê rayîrê telefonî pare kerd ke wextê peyênî de hînî ê nêeşkenê kantînî ra zî çîyêk bihêrînê. Her çi zaf vay o.
* Zîndanê Gebze de 3ê adare ra nata gardîyanî heqaretê tepişteyan kenê. Şadîye Menav, Hacere Halîl Yusuf û Rojbîne Perîşan rê cezaya hucreyî ameye dayene.
* Zîndanê Sîlîvrî de Kemal Ekîncî nêweşê qelbî yo. Ekîncî koxuşêkê bêhewayî de yeno tepiştene. Tepişteyî bi asanî nêeşkenê şorê revîr. Tepişteyê nêweşî nêerşawîyenê revîr. Tepişteyî vanê karantîna bêdermanî ra zehmetêr a. Zafer Saglam û Hamza Polat ê ke Zîndanê Sîlîvrî de yê, nika binê karantîna de yê. STENBOL
